ডিজিটেল ডেস্কঃ কেন্দ্ৰীয় বৈদেশিক পৰিক্ৰমা মন্ত্ৰী এছ জয়শংকৰে বৃহস্পতিবাৰে (৮ জুন) দিল্লীৰ গুৰু অৰ্জুন দেৱ গুৰদ্বাৰা ভ্ৰমণ কৰি আফগানিস্তানৰ পৰা ভাৰতলৈ অহা শিখ শৰণাৰ্থীসকলক সাক্ষাৎ কৰি তেওঁলোকৰ সমস্যাৰ কথা শুনিবলৈ চেষ্টা কৰে।শিখ শৰণাৰ্থীৰ সমস্যা সমাধানৰ আশ্বাস দিয়াৰ লগতে নাগৰিকত্ব সংশোধনী আইনৰ কথাও উল্লেখ কৰে বৈদেশিক মন্ত্ৰীগৰাকীয়ে। তেওঁ কয় যে, "সেই আইনখন নথকাহেঁতেন এই লোকসকলৰ কি হ'লহেঁতেন।"
শিখ শৰণাৰ্থীসকলক লগ পোৱাৰ পিছত বৈদেশিক মন্ত্ৰী জয়শংকৰে সংবাদ মাধ্যমৰ আগত কয় যে, "তেওঁলোকে (শিখ শৰণাৰ্থীসকলে) তাত কাবুলত কি হৈছিল তাৰ অতি বিশদ বিৱৰণ দিছিল আৰু তেওঁলোকে যি কৈছিল সেয়া একেবাৰে সঁচা আছিল।"
ইয়াৰ পূৰ্বে বৈদেশিক মন্ত্ৰীগৰাকীয়ে আফগানিস্তানৰ পৰা ভাৰতলৈ অহা শিখসকলক লগ কৰিব বিচাৰিছিল আৰু তেওঁলোকৰ সমস্যাসমূহ বুজিব বিচাৰিছিল বুলিও উল্লেখ কৰে। তেওঁ কয় যে শিখ শৰণাৰ্থীসকলৰ ভিছা আৰু নাগৰিকত্ব সম্পৰ্কে কিছু সমস্যা আছে, সেই সমস্যাসমূহ সমাধান হ’ব।
উল্লেখযোগ্য যে কেন্দ্ৰত বিজেপি নেতৃত্বাধীন মোদী চৰকাৰৰ ৯ বছৰ সম্পূৰ্ণ হ'ল। চৰকাৰৰ কৃতিত্বসমূহ জনসাধাৰণৰ মাজলৈ লৈ যোৱাৰ বাবে বিজেপিয়ে অভিযান চলাইছে। ইয়াৰ অধীনত বৃহস্পতিবাৰৰ পৰা (৮ জুন) প্ৰচাৰ আৰম্ভ কৰিছে বৈদেশিক মন্ত্ৰীগৰাকীয়ে। তদুপৰি জয়শংকৰে দিল্লীত এখন সংবাদমেল সম্বোধন কৰি ৰাজনীতিৰ লগত জড়িত বহু প্ৰশ্নৰ উত্তৰ দিয়ে।
