ডিজিটেল ডেস্কঃ আমাৰ বহু সংখ্যকৰে প্ৰিয় শীতল পানীয়। বিশেষকৈ গৰমত শৰীৰক অলপ আৰাম দিবৰ বাবে সততে শীতল পানীয়ৰ আশ্ৰয় লোৱা হয়। আমি সেৱন কৰা শীতল পানীয়ই স্বাস্থ্যৰ ওপৰত কি প্ৰভাৱ পেলাব পাৰে সেয়া হয়তো আমি ভাবি চোৱা নাই? এক গৱেষণাত পোহৰলৈ আহিছে যে, হাই চুগাৰ লেবেল থকা পানীয় খোৱাৰ ফলত মানুহৰ স্বাস্থ্যত বিৰূপ প্ৰভাৱ পৰিছে।
শেহতীয়াকৈ নেচাৰ মেডিচিনে এক গৱেষণাত প্ৰকাশিত তথ্য অনুসৰি ২০২০ চনত হাই চুগাৰ লেবেলৰ শীতল পানীয় সেৱনৰ ফলত বিশ্বজুৰি প্ৰায় ২২ লাখ লোক টাইপ ২ ডায়েবেটিছ ৰোগত আক্ৰান্ত হৈছে। নেচাৰ মেডিচিনে এই গৱেষণাত ১৮৪খন দেশৰ সমীক্ষা চলাইছিল। গৱেষণাত পোহৰলৈ আহিছে যে অধিক চেনিযুক্ত শীতল পানীয় খোৱাৰ বাবে বিশ্বজুৰি কিমানজন লোক ডায়েবেটিছ আৰু হৃদৰোগৰ কৱলত পৰিছে। টাইপ ২ ডায়েবেটিছ ৰোগীৰ উপৰিও গৱেষকসকলে অনুমান কৰিছে যে, হৃদৰোগৰ ১২ লাখ ৰোগী শীতল পানীয় সেৱনৰ সৈতে জড়িত হৈ আছে।
উল্লেখ্য যে বিশ্বজুৰি পুৰুষে মহিলাতকৈ অধিক শীতল পানীয় সেৱন কৰে বুলি এই অধ্যয়নত প্ৰকাশ পাইছে। ইয়াৰোপৰি যুৱক-যুৱতীসকলেও অধিক শীতল পানীয় সেৱন কৰে বুলি তথ্য প্ৰকাশ পাইছে। শীতল পানীয়ৰ ফলত হোৱা ৰোগৰ মাত্ৰা বিশ্বৰ বিভিন্ন অঞ্চলত বেলেগ বেলেগ। আৰু গৱেষণাত কোৱা হৈছে যে, সৰ্বাধিক পৰিমাণৰ শীতল পানীয় খোৱাৰ বাবে লেটিন আমেৰিকা, কেৰিবিয়ান আৰু উপ-চাহাৰা আফ্ৰিকাত সৰ্বাধিক লোক অসুস্থ হৈ পৰিছে।
উল্লেখযোগ্য যে উপ-চাহাৰা আফ্ৰিকাৰ ২১ শতাংশ লোক শীতল পানীয় সেৱনৰ বাবে ডায়েবেটিছৰ বলি হৈছে। লেটিন আমেৰিকা আৰু কেৰিবিয়ানত ২৪ শতাংশ ডায়েবেটিছ আৰু ১১ শতাংশ হৃদৰোগত আক্ৰান্ত হোৱাৰ তথ্য পোৱা গৈছে।
এই গৱেষণাত প্ৰকাশিত তথ্য অনুসৰি ২০২০ চনত কলম্বিয়াত ৫০ শতাংশ ডায়েবেটিছ ৰোগীৰ কাৰণ আছিল চেনিযুক্ত শীতল পানীয়। আমেৰিকাতো শীতল পানীয় খোৱাৰ বাবে টাইপ ২ ডায়েবেটিছ ৰোগীৰ সংখ্যা বৃদ্ধি পোৱা বুলি জানিব পৰা গৈছে। আমেৰিকাত ১৯৯০ চনৰ পৰা ২০২০ চনলৈ প্ৰতি ১০ লাখ লোকৰ বিপৰীতে ৬৭১ জন ডায়েবেটিছত আক্ৰান্ত। মধ্যবিত্তীয় দেশসমূহত চেনিযুক্ত শীতল পানীয়ৰ বজাৰ বৃহৎ পৰিসৰ হোৱা বাবে তেওঁলোকৰ স্বাস্থ্যৰ ওপৰতো যথেষ্ঠ প্ৰভাৱ পৰে।
Continue Reading
