ডিজিটেল ডেস্কঃ ডায়েটিং কৰি মৃ্ত্যুক সাবটিলে এগৰাকী ১৮ বছৰীয়া যুৱতীয়ে। শ্লীম হৈ থাকিবলৈ যুৱতীগৰাকীয়ে অনলাইনত চাই চাই শিকিলে ডায়েটিং। ছোৱালীজনীয়ে নিজৰ ওজন কম কৰিবলৈ অনলাইন প্লেটফৰ্মৰ সহায়ত বিশেষ ডায়েট প্লেন মানি চলিছিল।
অৱশেষত খাদ্যৰ অভাৱত সৃষ্টি হোৱা জটিল শাৰীৰিক সমস্যাত ভুগি মৃত্যুক সাবটিলে যুৱতীগৰাকীয়ে। কেৰালাৰ কান্নুৰত ঘটিছে এই ঘটনা। মৃত যুৱতীগৰাকীৰ নাম শ্ৰীনন্দা।
কান্নুৰৰ কুঠুপাৰম্বাৰ বাসিন্দা শ্ৰীনন্দাৰ থালাছেৰীৰ এখন চিকিৎসালয়ত চিকিৎসাৰ সময়ত মৃত্যু হয়। শেষ মুহূৰ্তত তেওঁ ভেণ্টিলেটৰৰ সহায়ত আছিল। আত্মীয়ই কয় যে শ্ৰীনন্দাই ওজন বৃদ্ধিৰ ভয়ত খাদ্য এৰি দিছিল আৰু আগতে বহুত ব্যায়াম কৰিছিল। খবৰ অনুসৰি তেওঁ লিকুইড ডায়েট কৰি আছিল আৰু অনাহাৰৰ পথত আছিল।
শ্ৰীনন্দা মত্তনুৰ পাঝাছিৰাজা এন এছ এছ কলেজৰ প্ৰথম বৰ্ষৰ স্নাতক ছাত্ৰী আছিল। চিকিৎসা বিশেষজ্ঞৰ মতে, ই খাদ্যাভ্যাসৰ বিকাৰ এনৰেক্সিয়া নাৰ্ভ’ছাৰ হ’ব পাৰে।এই ৰোগীৰ সংখ্যা কোভিডৰ পিছৰ সময়ছোৱাত যথেষ্ট বেছি হোৱা দেখা গৈছে।
খাদ্য-পানীয়ৰ সন্দৰ্ভত মূৰ্খামিৰ বাবেই আগতেও এনে বহু ঘটনা পোহৰলৈ আহিছে। বহু সময়ত ভুল ডায়েটিং আৰু শৰীৰ গঠনৰ বাবে ব্যৱহাৰ কৰা ষ্টেৰইডে মানুহৰ প্ৰাণ কাঢ়ি লৈছে।
