ডিজিটেল ডেস্কঃ এক হৃদয় বিদাৰক ঘটনা সংঘটিত হৈছে৷ স্কুললৈ গৈ থকা অৱস্থাত কৰুণ মৃত্যুক সাবটিলে এগৰাকী ছাত্ৰীয়ে। ছাত্ৰীগৰাকীৰ হাৰ্ট এটেকত মৃত্যু হয়। তেলেংগানাৰ কামাৰেড্ডী জিলাত সংঘটিত হৈছে এই কৰুণ ঘটনা। নিধি ৰামাৰেড্ডী নামৰ ১৬ বছৰীয়া ছাত্ৰীগৰাকীয়ে স্কুললৈ গৈ থকা অৱস্থাত হঠাতে হাৰ্ট এটেকত আক্ৰান্ত হৈ থিতাতে মৃত্যুক সাৱটি লয়।
বৃহস্পতিবাৰে পুৱা নিধিয়ে সদায়ৰ দৰে স্কুললৈ গৈ আছিল, স্কুল পাবলৈ অলপ সময় থকা অৱস্থাত হঠাতে বুকুৰ তীব্ৰ বিষ অনুভৱ কৰি অচেতন হৈ পৰিল নিধি। তাত উপস্থিত থকা এজন শিক্ষকে লগে লগে তেওঁক ওচৰৰ চিকিৎসালয় এখনলৈ লৈ গ’ল, য’ত চিকিৎসকে তেওঁক বচাবলৈ বহু চেষ্টা কৰিলে, কিন্তু তেওঁৰ স্বাস্থ্যৰ কোনো উন্নতি নহ’ল। ইয়াৰ পাছত তেওঁক এখন ডাঙৰ চিকিৎসালয়লৈ প্ৰেৰণ কৰা হয়, য’ত চিকিৎসকে নিধিক মৃত বুলি ঘোষণা কৰে।
এই ঘটনাই বিদ্যালয়খনত শোকৰ জোৱাৰৰ সৃষ্টি কৰিছে। নিধিৰ অকাল মৃত্যুত শিক্ষক আৰু সহপাঠীসকলে গভীৰ শোক প্ৰকাশ কৰিছে। নিধিক আকস্মিকভাৱে হেৰুৱাই কান্দি কান্দি শোকত ভাগি পৰিছে পৰিয়াল।
ইমান কম বয়সতে সঘনাই হাৰ্ট এটেকত মৃত্যু হোৱা ঘটনাই সকলোকে চিন্তিত কৰি তুলিছে। বিশেষজ্ঞসকলৰ মতে শিশুৰ হঠাৎ হাৰ্ট এটেকৰ আঁৰত বহু কাৰণ থাকিব পাৰে, য’ত জিনীয় সমস্যা, মানসিক চাপ, অনুচিত খাদ্য আৰু অস্বাস্থ্যকৰ জীৱনশৈলী আদিও থাকিব পাৰে।
উল্লেখ্য যে যোৱা দুবছৰত হাৰ্ট এটেকৰ ফলত হোৱা মৃত্যুৰ সংখ্যা ২২% বৃদ্ধি পাইছে।
Continue Reading
