সংসদৰ অধিৱেশনৰ প্ৰথম দিন : প্ৰধানমন্ত্ৰীৰ ভাষণৰ মাজতে বিৰোধীৰ শ্লোগান

মুম্বাই : আজিৰ পৰা আৰম্ভ হৈছে সংসদৰ বৰ্ষাকালীন অধিৱেশন। অধিৱেশনৰ প্ৰথম দিনাই সদনত সৃষ্টি হ’ল অবাঞ্চিত পৰিস্থিতিৰ। প্ৰধানমন্ত্ৰী মোদীয়ে আনকি তেওঁৰ মন্ত্ৰীসভাত নতুনকৈ অন্তৰ্ভুক্ত হোৱা মন্ত্ৰীসকলকো চিনাকি কৰি দিবলৈ সক্ষম নহ’ল। তেওঁ মন্ত্ৰীসকলক চিনাকি কৰি দিবলৈ লওঁতেই বিৰোধীয়ে বিভিন্ন শ্লোগান দিবলৈ আৰম্ভ কৰে। দামবৃদ্ধি, কৃষকৰ প্ৰতিবাদৰ প্ৰসংগৰে শ্লোগান দিবলৈ আৰম্ভ কৰে বিৰোধী দলসমূহে। এনে পৰিস্থিতিত উচ্চ আৰু নিম্ন সদনৰ কাম-কাজ স্থগিত ৰাখিবলগীয়া হয়। প্ৰধানমন্ত্ৰী মোদীয়ে পৰম্পৰাগতভাৱে তেওঁৰ ভাষণ আৰম্ভ কৰে আৰু বিৰোধীক কঠিনতম প্ৰশ্ন সুধিবলৈ আহ্বান জনায়।

কিন্তু এই প্ৰশ্নবোৰৰ উত্তৰ দিবলৈ চৰকাৰক যাতে সুযোগ দিয়ে তাৰ বাবে তেওঁ বিৰোধীক আবেদন জনায়। কিন্তু প্ৰধানমন্ত্ৰীৰ ভাষণৰ মাজতে বিৰোধীয়ে হুলস্থূলীয়া পৰিস্থিতিৰ সৃষ্টি কৰাত তেওঁ আধাতে ভাষণ সামৰিবলৈ বাধ্য হৈ পৰে। বিৰোধীৰ এই বাধাক লৈ প্ৰতিক্ৰিয়া প্ৰকাশ কৰি মোদীয়ে কয়, ‘সম্ভৱতঃ দেশৰ মহিলা, পিছপৰা শ্ৰেণীৰ লোক, কৃষকৰ সন্তান মন্ত্ৰী হোৱা কথাটো কিছুমান লোকে ভাল পোৱা নাই। সেইবাবে তেওঁলোকে এইসকল মন্ত্ৰীক চিনাকি কৰি দিবলৈও সুযোগ দিয়া নাই।’ বিৰোধীৰ এই ভূমিকাক শাসকীয় দলটোৱে সমালোচনা কৰিছে। প্ৰতিৰক্ষামন্ত্ৰী ৰাজনাথ সিঙে বিৰোধীক সমালোচনা কৰি কয় যে, এনে পৰিস্থিতি মোৰ ২৪বছৰীয়া সংসদীয় জীৱনত কেতিয়াও সংঘটিত হোৱা নাছিল।’ বিৰোধীৰ এই ভূমিকাক তেওঁ সংসদৰ বাবে ‘অস্বাস্থ্যকৰ’ আৰু দুৰ্ভাগ্যজনক আখ্যা দিয়ে।