বিধ্বংসী আক্ৰমণৰ ১০০০ বছৰ; সোমনাথ জ্যোতিৰ্লিংগ মন্দিৰত ‘সোমনাথ স্বাভিমান পৰ্ব’ৰ আয়োজন

ডিজিটেল ডেস্ক: ২০২৬ চনটো সোমনাথ মন্দিৰৰ ইতিহাসত এক অতি বিশেষ বছৰ, কিয়নো ১০২৬ চনত সোমনাথৰ ওপৰত প্ৰথমটো বিধ্বংসী আক্ৰমণৰ ১০০০ বছৰ সম্পূৰ্ণ হ’ব। গুজৰাটৰ উপকূলত অৱস্থিত এই মন্দিৰটো কেৱল এক মন্দিৰ নহয়, এই মন্দিৰটো ভাৰতৰ আত্মসন্মান আৰু অদম্য বিশ্বাসৰ প্ৰতীক। ইয়াৰ ক্ষতিসাধন কৰিবলৈ আক্ৰমণকাৰীয়ে কৰা অসংখ্য প্ৰচেষ্টাৰ সাক্ষী ইতিহাসেই দিয়ে যদিও সোমনাথ মন্দিৰ আজিও গৌৰৱেৰে থিয় হৈ আছে।

সোমনাথ মন্দিৰ ভাৰতৰ পশ্চিম প্ৰান্তৰ সমুদ্ৰতীৰত গুজৰাট ৰাজ্যত অৱস্থিত এটি পবিত্ৰ তীৰ্থস্থান। সমগ্ৰ ভাৰতৰ বিভিন্ন স্থানত অৱস্থিত ভগৱান শিৱৰ বাৰটা জ্যোতিৰ্লিংগৰ ভিতৰত সোমনাথৰ স্থান প্ৰথম বুলি কোৱা হয়। 

সোমনাথ মন্দিৰত একাধিকবাৰ আক্ৰমণ হৈছিল, ইয়াৰ ভিতৰত আটাইতকৈ উল্লেখযোগ্য আছিল ১০২৬ চনত মহম্মদ গজনীৰ আক্ৰমণ। ইয়াৰ উপৰিও, ৭২৫ খ্ৰীষ্টাব্দত আৰব শাসনকৰ্তা জুনায়েদ আৰু ১২৯৭ চনত উলুঘ খান (আলাউদ্দিন খিলজিৰ সেনাপতি), ১৩৯৫ খ্ৰীষ্টাব্দত জাফৰ খান আদিৰ দৰে অন্যান্য আক্ৰমণকাৰীয়ে মন্দিৰটো ধ্বংস কৰিছিল, কিন্তু প্ৰতিবাৰেই ইয়াক পুনৰ নিৰ্মাণ কৰা হৈছিল। 

এই আক্ৰমণৰ ভিতৰত আটাইতকৈ ভয়ংকৰ আক্ৰমণ হিচাপে বিবেচিত ১০২৬ চনত মহম্মদ গজনীয়ে চলোৱা আক্ৰমণ৷ সোমনাথত প্ৰথম আক্ৰমণ চলাইছিল মহম্মদ গজনীয়ে৷ ১০২৬ চনৰ জানুৱাৰী মাহত ৩০ হাজাৰ সৈনিক লৈ মন্দিৰত তেওঁ ধুমুহাৰ সৃষ্টি কৰিছিল। প্ৰায় ৫০,০০০ ভক্তই মন্দিৰ ৰক্ষা কৰিবলৈ প্ৰাণ আহুতি দিছিল৷ যাৰ ফলত মন্দিৰটোৰ ব্যাপক ক্ষতি হৈছিল, কিন্তু ইয়াক পুনৰ নিৰ্মাণ কৰা হৈছিল।

বিভিন্ন ৰজা যেনে পৰমাৰ ৰজা ভোজ আৰু চোলংকি ৰজা ভীমে মন্দিৰটো পুনৰ নিৰ্মাণ কৰাত অৰিহণা যোগাইছিল। স্বাধীনতাৰ পিছত, চৰ্দাৰ বল্লভভাই পেটেলৰ নিৰ্দেশনাত মন্দিৰটোৰ বৰ্তমানৰ ৰূপত পুনৰ নিৰ্মাণ আৰম্ভ হয়, যি ভাৰতীয় ঐতিহ্যৰ প্ৰতীক হৈ পৰিছে। 

সোমনাথৰ ধৰ্মীয় তাৎপৰ্যও অনন্য। বাৰটা জ্যোতিৰ্লিংগৰ ভিতৰত ই প্ৰথম স্থানত আছে আৰু ইয়াৰ মূল মন্দিৰ চন্দ্ৰ, সূৰ্য্য আৰু ভগৱান শ্ৰীকৃষ্ণই নিৰ্মাণ কৰা বুলি বিশ্বাস কৰা হয়। প্ৰতিদিনে মহাদেৱক ১২০০ কিলোমিটাৰ দূৰৰ পৰা অনা গংগা পানীৰে অভিষেক কৰা হয় আৰু চন্দ্ৰগ্ৰহণৰ সময়ত লাখ লাখ ভক্তই এই মন্দিৰ দৰ্শন কৰেহি।

বিধ্বংসী আক্ৰমণৰ ১০০০ বছৰ সম্পূৰ্ণ হোৱা উপলক্ষে অহা ৮ জানুৱাৰীৰ পৰা ১১ জানুৱাৰীলৈ ‘সোমনাথ স্বাভিমান পৰ্ব’ অনুষ্ঠান অনুষ্ঠিত হ’ব, য’ত প্ৰধানমন্ত্ৰী নৰেন্দ্ৰ মোদীয়েও অংশগ্ৰহণ কৰিব। এই উৎসৱ কেৱল ভক্তিৰ উদযাপন নহয়, ইয়াৰ জৰিয়তে ভাৰতৰ গৌৰৱময় সভ্যতা আৰু অদম্য আত্মসন্মানক স্মৰণ কৰা হ’ব৷ বাৰে বাৰে আক্ৰমণ কৰাৰ পাছতো সনাতন ধৰ্মৰ ঐতিহ্য প্ৰতিফলিত কৰি সগৌৰৱেৰে সোমনাথ মন্দিৰ থিয় হৈ থকাৰ বাবে ‘সোমনাথ স্বাভিমান পৰ্ব’ৰ আয়োজন কৰা হৈছে।