ডিজিটেল ডেস্কঃ মাৰিয়া ছাৰাপোভাই জন্ম দিলে এটি পুত্ৰ সন্তান। ৫বাৰৰ গ্ৰেণ্ড শ্লাম বিজয়ী গৰাকীয়ে ইনষ্টাগ্ৰামত এখন ছবি পোষ্ট কৰি এই খবৰ ঘোষণা কৰে। প্ৰেমিক আলেকজেণ্ডাৰ গিলকেছ আৰু তেওঁৰ পুত্ৰৰ সৈতে ফটো পোষ্ট কৰিছিল। ছ’চিয়েল মিডিয়াত প্ৰকাশ পোৱাৰ লগে লগে ভাইৰেল হৈ পৰে ছবিখন।
ইনষ্টাগ্ৰামত ফটোখনৰ কেপচনত ছাৰাপোভাই লিখিছে, ‘আমাৰ সৰু পৰিয়ালটোৱে আটাইতকৈ ধুনীয়া আৰু অমূল্য উপহাৰ লাভ কৰিলে।’ স্মৰ্তব্য যে, টেনিছ জগতৰ এই গ্লেমাৰ গাৰ্লগৰাকীয়ে চলিত বৰ্ষৰ এপ্ৰিল মাহতে নিজৰ মাতৃত্বৰ কথা ঘোষণা কৰিছিল।
কেৰিয়াৰৰ মাজভাগতে ড’পিঙৰ বাবে নিৰ্বাসিত হৈছিল এইগৰাকী গ্লেমাৰ গাৰ্লে। অৱশ্যে, কামবেক কৰে যদিও ব্যৰ্থ হয় ছাৰাপোভা। পৰৱৰ্তী সময়ত ২০২০ চনত টেনিছৰ পৰা অৱসৰ গ্ৰহণ কৰে ৰাছিয়ান খেলুৱৈগৰাকীয়ে।
তেওঁ আন্তঃৰাষ্ট্ৰীয় কেৰিয়াৰত ৫বাৰকৈ গ্ৰেণ্ড শ্লাম জয় কৰিছিল। ২০০৪ চনত ১৭ বছৰ বয়সত উইম্বলডন জয়ী হৈছিল তেওঁ। ইয়াৰ পিছত ২০০৬ চনত ইউ এছ অ’পেন, ২০০৮ চনত অষ্ট্ৰেলিয়ান অ’পেন, ২০১২ আৰু ২০১৪ চনত ফ্ৰেন্স অ’পেনত নিজৰ নাম সোণালী আখৰেৰে লিখিছিল ছাৰাপোভাই।
Continue Reading
