ডিজিটেল ডেস্কঃ খং নামেই চণ্ডাল। খঙৰ প্ৰকোপত মানুহে হিতাহিত জ্ঞান হেৰুৱাই বহু অঘটন ঘটায়। খঙৰ বাবেই বিহাৰৰ সমচীপুৰত সংঘটিত হৈছে এক ভয়ংকৰ ঘটনা।
স্বামীৰ সৈতে কাজিয়া লাগি খঙত নিজৰ তিনিটা সন্তানক কুঁৱাত পেলাই দিলে এগৰাকী মহিলাই। আৰক্ষীয়ে গ্ৰেপ্তাৰ কৰিছে অভিযুক্ত মাতৃক। খবৰটো পোহৰলৈ অহাৰ লগে লগে অঞ্চলটোত এক চাঞ্চল্যৰ সৃষ্টি হয়।
ধৃত মহিলাগৰাকীৰ নাম সীমা দেৱী। সমচীপুৰ জিলাৰ মালিনগৰ গাঁৱৰ বাসিন্দা তেওঁ। দেওবাৰে ৩৬ বছৰীয়া স্বামী চন্দন মহতাৰ সৈতে কাজিয়া হয় সীমাৰ। নিশা তিনিটা সন্তান চন্দন মহতাৰ কাষত শুই আছিল। সীমাই প্ৰথমে কন্যা সন্তানটিক মাতি আনি কুঁৱাৰ পাৰলৈ লৈ যায়। কুঁৱাৰ পাৰত থেকেচি থেকেচি কন্যা সন্তানটিক আধামৰা কৰি কুঁৱাত দলিয়াই দিয়ে। আন দুটি সন্তানকো তেনেদৰেই হত্যা কৰে সীমা দেৱীয়ে। পাছদিনা স্বামীক তেওঁ সন্তানকেইটি নিৰুদ্দেশ হোৱা বুলি কয়।
এই সন্দৰ্ভত স্থানীয় থানাত এজাহাৰ দাখিল কৰে চন্দন মহতাই। অভিযোগৰ ভিত্তিত আৰক্ষীয়ে তদন্ত আৰম্ভ কৰাত পোহৰলৈ আহে চাঞ্চল্যকৰ তথ্য। তালাচী অভিযান আৰম্ভ হোৱাৰ সময়তে ঘৰৰ কুঁৱাত তিনিটা শিশুৰ মৃতদেহ উদ্ধাৰ হয়। ইয়াৰ পিছত আৰক্ষীয়ে সীমাক গ্ৰেপ্তাৰ কৰি জেৰা আৰম্ভ কৰে। সীমাই জেৰাত স্বীকাৰ কৰে যে খঙতে তিনিওটা শিশুক হত্যা কৰি কুঁৱাত পেলাই দিছে।
নিহত তিনিটা শিশুৰ নাম হৈছে তৰুণ(৬), তনয়া (৪) আৰু তানিষ্ক (২)। সীমাক আৰক্ষীয়ে গ্ৰেপ্তাৰ কৰি ভাৰতীয় দণ্ডবিধিৰ ১৩৭(২) আৰু ৯৭ ধাৰাত গোচৰ ৰুজু কৰিছে।
মৰণোত্তৰ পৰীক্ষাৰ অন্তত তিনিওটা শিশুৰ মৃতদেহ পৰিয়ালৰ লোকক গতাই দিয়ে আৰক্ষীয়ে। মৃত তিনিওটি সন্তানৰে মুখাগ্নি কৰে পিতৃয়ে। ল’ৰা-ছোৱালীকেইটাৰ মৃতদেহ আহি পোৱাৰ লগে লগে ঘৰটোত আত্মীয়-স্বজন আৰু মানুহৰ ভিৰ হয়। সকলোৱে একেটা বিষয়তে আলোচনা কৰি আছিল যে কেনেধৰণৰ কাজিয়া হলে নিজ মাতৃয়ে নিজৰ তিনিটা সন্তানক হত্যা কৰিব পাৰে!
Continue Reading
