তেওঁ সন্ত্ৰাসবাদত অভিযুক্ত নেকি? আদালতত প্ৰশ্ন ৰাজ কুন্দ্ৰাৰ অধিবক্তাৰ

মুম্বাই : পৰ্ন ৰেকেট চলোৱাৰ গোচৰত গ্ৰেপ্তাৰ হোৱা চেলিব্ৰেটি ব্যৱসায়ী তথা অভিনেত্ৰী শিল্পা শেট্টীৰ পতি ৰাজ কুন্দ্ৰাৰ জামিন আবেদন নাকচ কৰিলে আদালতে। মুম্বাইৰ এখন আদালতত ৰাজ কুন্দ্ৰা আৰু তেওঁৰ সহযোগী ৰিয়ান থৰ্পৰ জামিন আবেদন আজি নাকচ কৰা হয়।

তেওঁৰ অধিবক্তাই আৰক্ষীক আদালতত প্ৰশ্ন কৰে যে, কিহৰ আধাৰত তেওঁৰ জামিন আবেদনৰ বিৰোধিতা কৰা হৈছে? তেওঁ সন্ত্ৰাসবাদৰ গোচৰত অভিযুক্ত লোক নেকি? উল্লেখ্য যে, দুসপ্তাহৰ বাবে ৪৫ বছৰীয়া কুন্দ্ৰা আৰু তেওঁৰ সহযোগীক ন্যায়িক জিম্মালৈ প্ৰেৰণ কৰিছিল আদালতে। তীব্ৰ গতিত তদন্ত প্ৰক্ৰিয়া চলি থকাৰ মাজতে মুম্বাইৰ আৰ্থাৰ ৰোড কাৰাগাৰত বন্দী হৈ আছে চেলিব্ৰিটী ব্যৱসায়ী কুন্দ্ৰা।

তেওঁৰ বিৰুদ্ধে তেওঁৰেই চাৰিজন কৰ্মচাৰীয়ে সাক্ষ্য দিবলৈ সাজু হোৱাৰ পাছত ৰাজ কুন্দ্ৰাৰ বিপদ বৃদ্ধি হোৱাৰ আশংকা কৰা হৈছিল। ইফালে তেওঁৰ গ্ৰেপ্তাৰক অনৈতিক আখ্যা দি তেওঁৰ অধিবক্তাই উচ্চ ন্যায়ালয়ত দাখিল কৰা আবেদনৰ শুনানি মঙলবাৰে স্থগিত ৰাখে ন্যায়ালয়ে। বৃহস্পতিবাৰে এই আবেদনৰ শুনানি পুনৰ গ্ৰহণ কৰা হ’ব।