ছিকাগ’ত অনুষ্ঠিত ৪৬সংখ্যক অসম অভিৱৰ্তনৰ সফল সামৰণি

ডিজিটেল ডেস্কঃ আমেৰিকাৰ ছিকাগ’ত অনুষ্ঠিত ৪৬ সংখ্যক অসম অভিৱৰ্তনৰ ৫ জুলাইত সফল সামৰণি হয়৷ ৩ -৫ জুলাইলৈ আয়োজিত এই অভিৱৰ্তনৰ শেষৰ দিনটোত পুৱাৰ ভাগত শিশুসকলৰ কুইজ প্ৰতিযোগিতাৰ লগতে Assam Association of North America চমুকৈ আনাৰ এখন বিশেষ সভা অনুষ্ঠিত হয়৷

বৰষা ৰাণী বিষয়াৰ এখনি বিহু কৰ্মশালাও আয়োজিত হয়৷ বিদেশত বৰষাৰ বিহু শিকিবলৈ উত্তৰ আমেৰিকাৰ বিভিন্ন প্ৰান্তৰৰ যুৱতী-মহিলাৰ লগতে যুৱকসকলেও অংশ লয়৷ লগতে Invest in Assam নামৰ এখনি বিশেষ আলোচনাচক্ৰও আয়োজিত হয় ৷ য’ত অসমত বিনিয়োগ কৰি কিদৰে অসমৰ বিভিন্ন ক্ষেত্ৰৰ লগতে পৰ্যটন উদ্যোগটো আগুৱাই নিব পাৰি সেই বিষয়ে বিষদভাৱে আলোচনা কৰা হয় ৷

এই আলোচনাত আমেৰিকাৰ অন্যতম উদ্যোগপতি ছিদ চৌধুৰী, অসমৰ উদ্যোগপতি ড° সঞ্জীৱ নাৰায়ণ, ডাঃ নৱ গোস্বামী উপস্থিত থাকে৷ সত্ৰীয়া নৃত্য, আধুনিক নৃত্যৰ লগতে বিভিন্ন গীত পৰিৱেশন কৰা হয় ৷ লগতে পণ্ডিত হেমচন্দ্ৰ গোস্বামীৰ জীৱনভিত্তিক এখনি তথ্যচিত্ৰও প্ৰদৰ্শন কৰা হয় ৷ AEC, JECৰ প্ৰাক্তন শিক্ষাৰ্থীসকলৰ লগতে চিকিৎসকসকলৰো এখন সন্মিলন অনুষ্ঠিত হয় ৷ লগতে বিখ্যাত ফেশ্বন ডিজাইনাৰ সংযুক্তা দত্তৰ ফেশ্বন শ্ব’ অনুষ্ঠিত হয় ৷ য’ত অসমৰ অভিনেত্ৰী আইমী বৰুৱাই Showstopper হিচাপে অংশগ্ৰহণ কৰে ৷

অনুষ্ঠানটোলৈ সাংস্কৃতিক সন্ধিয়াৰ মুখ্য আকৰ্ষণ হিচাপে পাপনক আমন্ত্ৰণ জনোৱা হয় ৷ পাপনে সহশিল্পীসকলৰ সৈতে এইবছৰৰ অসম অভিৱৰ্তনত গীত পৰিৱেশন কৰে ৷ উল্লেখযোগ্য যে পাপনে বহু বছৰৰ পাছত তেওঁৰ পুৰণি সহশিল্পী ৰেহানা আৰু গীটাৰিষ্ট জিণ্টি দত্তৰ সৈতেও গীত পৰিৱেশন কৰে ৷ অনুষ্ঠানৰ আঁত ধৰে অভিনেত্ৰী বৰষা ৰাণী বিষয়াই৷