ডিজিটেল ডেস্কঃ অশান্ত মণিপুৰত ইণ্টাৰনেট সেৱা প্ৰায় তিনি মাহৰ বাবে বন্ধ আছিল। অৱশেষত ৰাজ্য খনত ব্ৰডবেণ্ড ইণ্টাৰনেট সংযোগ পুনৰ মুকলি কৰা হৈছে। মণিপুৰ চৰকাৰে ৰাজ্যখনৰ কেইবাটাও ঠাইত ইণ্টাৰনেট ব্যৱহাৰ কৰিবলৈ চৰ্তসাপেক্ষ অনুমতি দিছে।
অৱশ্যে ছ'চিয়েল মিডিয়াৰ ব্যৱহাৰৰ ওপৰত নিষেধাজ্ঞা বাহাল থাকিব। তদুপৰি ৰাজ্য খনত কোনেও মোবাইল ডাটা ব্যৱহাৰ কৰিব নোৱাৰি। মঙলবাৰে জাৰি কৰা এক নিৰ্দেশত মণিপুৰ চৰকাৰে কয় যে পৰিস্থিতিৰ প্ৰতি লক্ষ্য ৰাখি সমগ্ৰ ৰাজ্যতে ক্ৰমান্বয়ে ইণ্টাৰনেট সেৱা মুকলি কৰা হ'ব। কুকি-মেইটেইৰ মাজত সংঘৰ্ষৰ বাবে মণিপুৰত ৮০ দিনৰ বাবে ইণ্টাৰনেট সেৱা স্থগিত ৰখা হৈছিল। ফলস্বৰূপে, বেংক , সংবাদসেৱা আৰু চিকিৎসালয়কে ধৰি কেইবাটাও গুৰুত্বপূৰ্ণ খণ্ডত কাম ব্যাহত হৈ পৰিছিল।
পৰিস্থিতিৰ বুজ লোৱাৰ পিছত মণিপুৰৰ গৃহ বিভাগে ৰাজ্যখনত ইণ্টাৰনেট সেৱা পুনৰ কৰাৰ সিদ্ধান্ত লয়। সেয়ে এতিয়াৰে পৰা বহু ক্ষেত্ৰত ব্ৰডবেণ্ডৰ জৰিয়তে ইণ্টাৰনেট সেৱা ব্যৱহাৰ কৰিব পৰা যাব বুলি নিৰ্দেশনা জাৰি কৰা হৈছে। ৰাজধানী ইম্ফলকে ধৰি কেইবাস্থানতো ইণ্টাৰনেট সেৱা ব্যৱহাৰ কৰিব পৰা যাব। অৱশ্যে, সাধাৰণ মানুহে এই মুহূৰ্তত ঘৰত ইণ্টাৰনেট ব্যৱহাৰ কৰিব নোৱাৰিব। ৰাজ্য প্ৰশাসনে এতিয়াও মোবাইল ডাটাৰ ব্যৱহাৰত কোনো শিথিলতা ঘোষণা কৰা নাই। ইয়াৰ উপৰি উচটনিমূলক তথ্য প্ৰচাৰ প্ৰতিহত কৰিবলৈ ছ'চিয়েল মিডিয়াৰ ব্যৱহাৰো সম্পূৰ্ণৰূপে বন্ধ ৰখা হৈছে।
Continue Reading
