ত্যাগৰ বাণীৰে আজি ইছলামধৰ্মী লোকে পালন কৰিছে ঈদ-উল-আজহা

ডিজিটেল ডেস্ক: আজি ঈদ-উল-আজহা(ঈদ-উল-আদহা)। সমগ্ৰ বিশ্বৰ লগতে অসমতো ইছলাম ধৰ্মাৱলম্বী লোকসকলে অত্যন্ত ভক্তি আৰু উলহ-মালহেৰে এই দিনটো এক বৃহৎ উৎসৱ হিচাপে পালন কৰিছে।

এই উৎসৱৰ এক বিশেষ তাৎপৰ্য হৈছে কোৰবানি বা ত্যাগৰ পৰম্পৰা। ইছলাম ধৰ্মত এই দিনটোত আল্লাহৰ নামত উৎসৰ্গিত কৰি জন্তু কোৰবানি দিয়াৰ এক দীৰ্ঘদিনীয়া ধৰ্মীয় পৰম্পৰা চলি আহিছে।

ঈদ-উল-আজহা কি আৰু ইয়াৰ গুৰুত্ব?

আৰৱী ভাষাত 'ঈদ' শব্দৰ অৰ্থ হৈছে আনন্দ-স্ফূৰ্তি বা উৎসৱ, আৰু 'আজহা' শব্দৰ অৰ্থ হৈছে কোৰবানি বা ত্যাগ। অৰ্থাৎ, সহজ অৰ্থত ঈদ-উল-আজহা হৈছে 'ত্যাগৰ উৎসৱ'।

এই উৎসৱৰ মূল লক্ষ্য হৈছে সমাজৰ ধনী আৰু আৰ্থিকভাৱে স্বাৱলম্বী লোকসকলৰ ত্যাগৰ জৰিয়তে যাতে দৰিদ্ৰ আৰু অভাৱী লোকসকলেও আনন্দৰ সমভাগী হ’ব পাৰে, তাৰ এক সুন্দৰ পৰিৱেশ সৃষ্টি কৰা। এই পবিত্ৰ উৎসৱক বহুবোৰে 'কোৰবানি ঈদ' বা 'বকৰী ঈদ' বুলিও কোৱা শুনিবলৈ পোৱা যায়।

প্ৰধানমন্ত্ৰী আৰু মুখ্যমন্ত্ৰীৰ শুভেচ্ছা বাৰ্তা

পবিত্ৰ ঈদ-উল-আজহা উপলক্ষে দেশ তথা ৰাজ্যবাসীক শুভেচ্ছাৰে ওপচাই পেলাইছে জনপ্ৰতিনিধিসকলে। 

প্ৰধানমন্ত্ৰী নৰেন্দ্ৰ মোদীয়ে সামাজিক মাধ্যমৰ জৰিয়তে দেশবাসীক ঈদৰ আন্তৰিক শুভেচ্ছা জ্ঞাপন কৰে। প’ষ্টটোৰ জৰিয়তে তেওঁ সমগ্ৰ দেশবাসীৰ সুখ, সুস্বাস্থ্য আৰু সফলতা কামনা কৰে।

অসমৰ মুখ্যমন্ত্ৰী ড° হিমন্ত বিশ্ব শৰ্মায়েও ৰাজ্যৰ ইছলাম ধৰ্মাৱলম্বী লোকসকললৈ শুভেচ্ছা বাৰ্তা প্ৰেৰণ কৰে। সামাজিক মাধ্যমত তেওঁ লিখে— “আজি ইছলাম ধৰ্মাৱলম্বী লোকসকলৰ ঈদ-উল-আদহা উপলক্ষে শুভেচ্ছা জ্ঞাপন কৰিলোঁ।”