ডিজিটেল ডেস্ক: ভাৰতৰ সীমান্ত সুৰক্ষা বাহিনী আৰু বাংলাদেশৰ ব'ৰ্ডাৰ গাৰ্ড বাংলাদেশৰ মাজত সঞ্চালক পৰ্যায়ৰ দ্বিবার্ষিক বৈঠক বৃহস্পতিবাৰে নতুন দিল্লীত সামৰণি পৰে। বৈঠকত কেইবাটাও গুৰুত্বপূৰ্ণ সিদ্ধান্ত দুয়োপক্ষই গ্ৰহণ কৰে।
ভাৰত-বাংলাদেশৰ সংশ্লিষ্ট সীমান্ত সুৰক্ষা বাহিনীৰ উপ-সেনাধ্যক্ষসকলৰ মাজত যোগাযোগৰ নতুন সংযোগৰ বাবে এটা 'হটলাইন' স্থাপন কৰিবলৈ সিদ্ধান্ত গ্রহণ কৰা হয়। বিগত বৰ্ষৰ ৫ আগষ্টত শ্বেখ হাছিনাৰ চৰকাৰ ক্ষমতাচ্যুত হোৱাৰ পাছত দুয়োখন দেশৰ সীমান্ত সুৰক্ষা বাহিনীৰ মাজত এইখন হৈছে প্রথম উচ্চস্তৰীয় বৈঠক। ১৮ ফেব্ৰুৱাৰীৰ পৰা ২০ ফেব্ৰুৱাৰীলৈকে তিনিদিনীয়াকৈ চলা বৈঠকখন সৌহার্দ্যপূর্ণ আছিল।
চুবুৰীয়া দেশখনৰ সীমান্তৰ কাষৰীয়া পাঁচখন ভাৰতীয় ৰাজ্যৰ সীমান্তত বাকী থকা ৪,০৯৬ কিঃমিটাৰ এলেকাত বেৰ নিৰ্মাণৰ গুৰুত্বৰ বিষয়ে বাংলাদেশৰ পক্ষক 'সম্মত' কৰিবলৈ ভাৰতীয় পক্ষ সক্ষম হয়। আনহাতে, নতুনকৈ স্থাপন কৰিবলগা প্ৰস্তাৱিত 'হটলাইন'এ ভাৰতৰ কলকাতাস্থিত বি এছ এফৰ ইষ্টার্ন কমাণ্ডৰ এ ডি জি আৰু ঢাকাস্থিত বি জি বিৰ মুখ্য কাৰ্যালয়ৰ এ ডি জিৰ মাজত সংযোগ ঘটাব। তদুপৰি, সীমান্তৰ স্পৰ্শকাতৰ অঞ্চলসমূহত দুয়োপক্ষৰ টহল বৃদ্ধি, উভয় দেশৰ নিৰীহ জনতাৰ ওপৰত আক্রমণ বন্ধ কৰা, কাঁটা তাঁৰৰ বেৰৰ নির্মাণ আদি গুৰুত্বপূৰ্ণ বিষয়তো বৈঠকত সিদ্ধান্ত লোৱা হয়।
(দৈনিক জমনভূমিৰ প্ৰতিবেদন)
Continue Reading
