ভাৰতৰ প্ৰতিষেধক কূটনীতি তুংগত : পাকিস্তানতো ব্যৱহাৰ হ’ব কোভিশ্বিল্ড

নতুন দিল্লী : বিশ্বৰ বিভিন্ন দেশলৈ প্ৰেৰণ কৰা হৈছে ভাৰতত উৎপাদিত কোভিড প্ৰতিষেধক। ভাৰতৰ ‘প্ৰতিষেধক কূটনীতি’য়ে ক্ৰমাৎ অধিক বিস্তাৰিত ৰূপ লাভ কৰা দেখা গৈছে। শেহতীয়াকৈ ভাৰতত উৎপাদিত ১ লাখ পালি প্ৰতিষেধক প্ৰেৰণ কৰা হৈছে ভাৰতৰ আন এখন বন্ধু ৰাষ্ট্ৰ ওমানলৈ। ভাৰতৰ চুবুৰীয়া ভালেকেইখন দেশলৈ দেশত উৎপাদিত প্ৰতিষেধক ইতিমধ্যে প্ৰেৰণ কৰা হৈছে।

আৰু পঢ়িব পাৰিব : নাৰীদেহ সৰবৰাহকাৰী চক্ৰৰ পৰা উদ্ধাৰ ১১ গৰাকী কিশোৰী – যুৱতীক !

যোৱা সপ্তাহত আফগানিস্তানলৈ প্ৰেৰণ কৰা হৈছিল ৫লাখ পালি কোভিড প্ৰতিষেধক। একেদৰে নেপাল আৰু শ্ৰীলংকালৈও প্ৰতিষেধক প্ৰেৰণ কৰিছে ভাৰতে। কেৱল এয়াই নহয়, ভাৰতে নিকাৰাগুৱালৈ ২লাখ পালি কোভিড প্ৰতিষেধক প্ৰেৰণ কৰিব। একেদৰে বাৰ্বাডোছলৈ ১লাখ, ড’মিনিকালৈ ৭০হাজাৰ আৰু মংগোলিয়ালৈ ১.৫লাখ পালি প্ৰতিষেধক ভাৰতে প্ৰেৰণ কৰিব। এই দেশসমূহৰ সৈতে কোভিড প্ৰতিষেধকৰ জৰিয়তেই এক শক্তিশালী কূটনৈতিক সম্পৰ্ক গঢ়ি উঠাৰ বাট মুকলি হৈছে।

ভাৰতে কোভিডৰ বাণিজ্যিক ৰপ্তানিৰ দিশতো উল্লেখনীয় পদক্ষেপ গ্ৰহণ কৰিছে। ইজিপ্ত, আলজেৰিয়া, ইউ এ ই, কুৱেইটৰ দৰে দেশে ভাৰতৰ পৰা ইতিমধ্যে প্ৰতিষেধক ক্ৰয় কৰিছে। তদুপৰি ভাৰতে উপহাৰ হিচাপে প্ৰতিষেধক পঠোৱা কেইবাখনো দেশ যেনে, মংগোলিয়া, নিকাৰাগুৱা, ছৌডি আৰৱ, ম্যানমাৰ, বাংলাদেশ, শ্ৰীলংকা আদিয়ে ভাৰতৰ পৰা কোভিড প্ৰতিষেধক ক্ৰয় কৰাৰ বাবে চুক্তিবদ্ধ হৈছে।

আৰু পঢ়িব পাৰিব : ভাঙি পৰিল ভৱন, চাৰিজন আবদ্ধ !

আনহাতে, ভাৰতত উৎপাদিত এষ্ট্ৰাজেনেকাৰ ৭ নিযুত কোভিশ্বিল্ড প্ৰতিষেধক পাকিস্তানৰ বিনামূলীয়া কোভিডবিৰোধী টিকাকৰণ অভিযানত অন্তৰ্ভুক্ত হ’ব। অহা সপ্তাহৰ পৰা দেশখনত এই অভিযান চলিব। পাকিস্তানৰ প্ৰধানমন্ত্ৰী ইমৰাণ খানৰ বিশেষ স্বাস্থ্য বিষয়ক সহকাৰী ডঃ ফাইজল ছুলতানে প্ৰকাশ কৰিছে যে, মাৰ্চৰ ভিতৰত ৭ নিযুত কোভিশ্বিল্ড দেশখনে লাভ কৰিব।