ডিজিটেল ডেস্ক: : ২৭ বছৰৰ পাছত দিল্লী কেন্দ্রীয় শাসিত অঞ্চলৰ বিধানসভাত বিজেপিয়ে একক
সংখ্যাগৰিষ্ঠতা লাভ কৰিলে। শনিবাৰে ঘোষণা কৰা দিল্লী বিধানসভাৰ নিৰ্বাচনৰ ফলাফলত ৭০খন আসনৰ ভিতৰত বিজেপিয়ে লাভ কৰে ৪৮ আৰু আম আদমি পার্টিয়ে (আপ) লাভ কৰে ২২খন আসন।
কংগ্ৰেছে তৃতীয়বাৰৰ বাবে এখনো আসন লাভ কৰিব নোৱাৰিলে। এই নির্বাচনত কংগ্ৰেছ আৰু আপে ৭০খন তথা বিজেপিয়ে ৬৮টা সমষ্টিত প্রতিদ্বন্দ্বিতা কৰিছিল। যোৱাবাৰতকৈ বিজেপিয়ে ৪০খন বেছি আসন লাভ কৰাৰ বিপৰীতে আপে ৪০খন আসন হেৰুৱায়। আপৰ ভোটৰ অংশ ২০২০ চনৰ নিৰ্বাচনৰ ৫৩.৫৭ শতাংশৰ পৰা ১০ শতাংশ হ্রাস পাই ৪৩.৫৭ শতাংশ হয়। আনহাতে বিজেপিৰ ভোটৰ অংশ ৩৮.৫১ শতাংশৰ পৰা ৭ শতাংশ বৃদ্ধি পাই ৪৫.৫৬ শতাংশ হয়। ইফালে তৃতীয়বাৰৰ বাবে এখনো আসন লাভ নকৰা তথা এইবাৰ ৬৭টা সমষ্টিত আমানতৰ ধন হেৰুওৱা কংগ্ৰেছৰ ভোটৰ অংশ ২.১ শতাংশ বৃদ্ধি পাইছে।
২০২০ৰ বিধানসভাৰ নিৰ্বাচনত কংগ্ৰেছৰ অংশ আছিল ৪.৩ শতাংশ আৰু এইবাৰ ই ৬.৩৪ শতাংশলৈ বৃদ্ধি পাইছে। উল্লেখযোগ্য যে বিজেপিয়ে ১৯৯৩ চনত ৪৯খন আসন অর্থাৎ দুই তৃতীয়াংশ আসন লাভ কৰিছিল। তেওঁলোকৰ পাঁচবছৰৰ শাসন কালত মদনলাল খুৰানা, চাহিব সিং বার্মা আৰু সুষমা স্বৰাজ মুখ্যমন্ত্রী হৈছিল। ১৯৯৮ চনৰ পাছত দিল্লীত ১৫ বছৰ কংগ্ৰেছে শাসন কৰে।ইয়াৰ পাছত ২০১৩ চনত আহে আম আদমি পাৰ্টিৰ চৰকাৰ।
(উৎস দৈনিক জনমভূমি)
Continue Reading
