ডিজিটেল ডেস্কঃ পুত্ৰৰ অকাল মৃত্যুৰ পাছত এগৰাকী ভাৰতীয় সেনাই এনে পদক্ষেপ গ্ৰহণ কৰিলে যিটোৱে প্ৰকাশ কৰিছে মানৱতাৰ উজ্জ্বল নিদৰ্শন। ছয়জন লোকক নতুন জীৱন দিলে সেনাগৰাকীয়ে।
পথ দুৰ্ঘটনাত পুত্ৰক অকালতে হেৰুৱালে সেনাগৰাকীয়ে। তেওঁ সাহস দেখুৱাই মৃত পুত্ৰৰ অংগদান কৰাৰ সিদ্ধান্ত লয়। লিভাৰ, কিডনী, অগ্নাশয় আৰু কৰ্ণিয়া দান কৰি তেওঁ পুত্ৰৰ স্মৃতিবোৰক জীয়াই ৰখাৰ সিদ্ধান্ত লয়। সেনাগৰাকীৰ এই সিদ্ধান্তত ছজনকৈ অসহায় লোকে লাভ কৰিলে নতুন জীৱন।
ঘটনা অনুসৰি ৮ ফেব্ৰুৱাৰীত সংঘটিত হোৱা এক পথ দুৰ্ঘটনাত সেনাবাহিনীৰ হাবিলদাৰ নৰেশ কুমাৰৰ ১৮ বছৰীয়া পুত্ৰ অৰ্শদীপ সিঙৰ মৃত্যু হয়। এই বেদনাদায়ক ক্ষতিৰ পিছতো হাবিলদাৰ নৰেশ কুমাৰে এটা সাহসী সিদ্ধান্ত ল’লে। তেওঁ পুত্ৰৰ লিভাৰ, কিডনী, অগ্নাশয় আৰু কৰ্ণিয়া দান কৰিবলৈ সন্মত হয়। এই সিদ্ধান্তই ছয়জন গুৰুতৰভাৱে অসুস্থ ৰোগীক নতুন জীৱন দিলে।
এই অংগদান প্ৰক্ৰিয়াৰ অংশ হিচাপে অৰ্শদীপৰ লিভাৰ আৰু কিডনী তৎক্ষণাত সেউজ কৰিডৰৰ মাজেৰে আৰ্মি হস্পিতাল ৰিচাৰ্চ এণ্ড ৰেফাৰেল, নতুন দিল্লীলৈ প্ৰেৰণ কৰা হয়। একে সময়তে পিজিআইত গুৰুতৰ টাইপ-১ ডায়েবেটিছ আৰু দীৰ্ঘদিনীয়া কিডনীৰ ৰোগত আক্ৰান্ত ৰোগীৰ কিডনী আৰু অগ্নাশয় সংৰোপণ কৰা হৈছিল।
ইয়াৰ উপৰিও দুজন লোকক চকুৰ দৃষ্টিশক্তি প্ৰদানৰ বাবে কৰ্ণিয়া প্ৰদান কৰা হয়। চণ্ডীমন্দিৰত অৱস্থিত কমাণ্ড হাস্পতালৰ বিশেষজ্ঞ দলটোৱে এই প্ৰক্ৰিয়াত ভূমিকা পালন কৰিছিল। হাবিলদাৰ নৰেশ কুমাৰৰ এই পদক্ষেপে সমাজখনকো অনুপ্ৰাণিত কৰিব যে ব্যক্তিগত ক্ষতিৰ মাজতো আমি আনৰ জীৱনত আশাৰ পোহৰ সিঁচিব পাৰো।
Continue Reading
