পুনৰ উভতি আহিল বিৰাট কোহলীৰ ইনষ্টাগ্ৰাম একাউণ্ট, হেক হৈছিল নেকি কোহলীৰ ইনষ্টাগ্ৰাম একাউণ্ট?

ডিজিটেল ডেস্ক: পুনৰ উভতি আহিল বিৰাট কোহলীৰ ইনষ্টাগ্ৰাম একাউণ্ট। ৩০ জানুৱাৰীৰ পুৱাৰ ভাগত বহু অনুৰাগীয়ে বিচাৰি পোৱা নাছিল ভাৰতীয় ক্ৰিকেটাৰ বিৰাট কোহলীৰ ইনষ্টাগ্ৰাম একাউণ্টটো। ইয়াৰ পিছতেই ইনষ্টাগ্ৰাম ব্যৱহাৰকাৰীসকলে বিৰাট কোহলীয়ে সামাজিক মাধ্যম ত্যাগ কৰিছে নেকি বুলি ধাৰণা কৰিছিল।

আনকি বহু লোকে ক্ৰিকেটাৰগৰাকীৰ ইনষ্টাগ্ৰাম একাউণ্টটো হেক হোৱা বুলিও সন্দেহ প্ৰকাশ কৰিছিল। অৱশ্যে বৰ্তমান পুনৰ ঘূৰি আহিছে ভাৰতীয় ক্ৰিকেটাৰ বিৰাট কোহলীৰ ইনষ্টাগ্ৰাম একাউণ্ট। ২৭ কোটি ফল'ৱাৰ্চ থকা একাউণ্টটো হঠাৎ নোহোৱা হৈ যোৱাৰ ঘটনাই অনুৰাগীসকলৰ মাজত চাঞ্চল্যৰ সৃষ্টি কৰিছিল।

বিৰাট কোহলীৰ একাউণ্টটো নোহোৱা হোৱাৰ বহু কাৰণ থাকিব পাৰে। কেতিয়াবা কোনো ব্যৱহাৰকাৰীৰ ওপৰত ইনষ্টাগ্ৰামৰ সন্দেহ উপজিলে সেই একাউণ্টটো ইনষ্টাগ্ৰামে নিজেই অস্থায়ী ভাৱে নিষ্ক্ৰিয় কৰি দিয়ে। কিন্তু বিৰাট কোহলীৰ ক্ষেত্ৰত এনে অসুবিধা হোৱাৰ সম্ভাৱনা কম কাৰণ তেওঁৰ একাউণ্টটো এটা ভেৰীফাইড একাউণ্ট। ইয়াৰ উপৰিও যদি কোনো একাউণ্টে হঠাতে অত্যাধিক ফ’ল’, আনফ’ল’, লাইক, কমেণ্ট লাভ কৰিবলৈ আৰম্ভ কৰে, তেন্তে ইনষ্টাগ্ৰামৰ চিষ্টেমে ইয়াক বট হিচাপে চিনাক্ত কৰিব পাৰে। কিন্তু বিৰাট কোহলীৰ ক্ষেত্ৰত এনে হোৱাৰ সম্ভাৱনা অতি কম।

আনহাতে কেতিয়াবা, ব্যৱহাৰকাৰীয়ে নিজেই নিজৰ ইনষ্টাগ্ৰাম একাউণ্ট নিষ্ক্ৰিয় কৰি থ'ব পাৰে। পিছত লগ ইন কৰি ইয়াক পুনৰ সক্ৰিয় কৰিব পাৰে। নিষ্ক্ৰিয় কৰি থোৱা সময়ছোৱাত একাউণ্টটো সম্পূৰ্ণৰূপে নোহোৱা হৈ যায় আৰু চাৰ্ছ কৰিলেওঁ দেখা পোৱা নাযায়।

কিছুমান ক্ষেত্ৰত এনে সমস্যাৰ সম্পূৰ্ণ কাৰণ ইনষ্টাগ্ৰাম হোৱা দেখা যায়। ইনষ্টাগ্ৰামৰ চাৰ্ভাৰত হোৱা সমস্যাৰ ফলত কিছুমান ব্যৱহাৰকাৰীৰ একাউণ্ট নোহোৱা হৈ যাব পাৰে। অৱশ্যে ইয়াৰ প্ৰভাৱ কেৱল এজন ব্যক্তিৰ ওপৰত নপৰে । আন এটা কাৰণ হ'ল ব্যৱহাৰকাৰীৰ নাম সলনি কৰা। কেতিয়াবা‌ ব্যৱহাৰকাৰীৰ নাম সলনি কৰাৰ বাবেও একাউণ্টটো জনসাধাৰণৰ বাবে অদৃশ্য হৈ পৰে। 

অৱশ্যে বিৰাট কোহলীয়ে নিজেই নিজৰ ইনষ্টাগ্ৰাম একাউণ্টটো নিষ্ক্ৰিয় কৰিছিল নে কাৰীকৰি বিজুতিৰ বাবে এনে হৈছিল, সেই বিষয়ে এতিয়াও জানিব পৰা হোৱা নাই।