ভুল দিশে অগ্ৰসৰ হৈছে আমেৰিকা যুক্তৰাষ্ট্ৰ : এন্থনী ফাউচি

ৱাশ্বিংটনঃ ক’ভিড-১৯ৰ ডেল্টা প্ৰকাৰ ইতিমধ্যে ১২৪খন দেশলৈ বিয়পি পৰিছে। আমেৰিকা যুক্তৰাষ্ট্ৰতো শেহতীয়াকৈ ডেল্টা প্ৰকাৰে ত্ৰাসৰ সৃষ্টি কৰা পৰিলক্ষিত হৈছে। কৰ’না মহামাৰী নিৰ্মূলৰ বাবে টিকাকৰণকে সমগ্ৰ বিশ্বই প্ৰধান অস্ত্ৰ হিচাপে গ্ৰহণ কৰিছে। বিশ্বৰ বিভিন্ন প্ৰান্তত এতিয়াও টিকাকৰণ প্ৰক্ৰিয়া জাৰি আছে। বিশ্বৰ আগশাৰীৰ দেশ আমেৰিকা যুক্তৰাষ্ট্ৰৰো নাজল-নাথল অৱস্থা। এনে পৰিপ্ৰেক্ষিতত শীৰ্ষ ৰোগ বিশেষজ্ঞ এন্থনী ফাউচিৰ বিস্ফোৰক মন্তব্য। সমগ্ৰ আমেৰিকা যুক্তৰাষ্ট্ৰত টিকাকৰণ নোহোৱা লোকসকলৰ মাজত ক’ভিড-১৯ ৰ ঘটনা, মৃত্যুৰ হাৰ আৰু চিকিৎসালয়ত ভৰ্তি হোৱাৰ ঘটনা বৃদ্ধি হৈ থকাৰ মূলতঃ দেশখন ভুল দিশে অগ্ৰসৰ হোৱা বুলি সংবাদমাধ্যমৰ আগত ফাউচিয়ে সদৰী কৰিছে।

লগতে তেওঁ কয়, ‘ ক’ভিড প্ৰতিষেধক গ্ৰহণ নকৰাসকলহে নতুনকৈ কৰ’নাত আক্ৰান্ত হৈছে। যিহেতু আমাৰ দেশৰ ৫০ শতাংশ লোকক সম্পূৰ্ণৰূপে টিকাকৰণ কৰা হোৱা নাই, সেয়া এক জটিল সমস্যাৰূপে দেখা দিছে। ক’ভিড প্ৰতিষেধক গ্ৰহণ নকৰা সৰহভাগ লোকৰ মৃত্যু হ’ব পাৰে।’ ক’ভিড প্ৰতিষেধক নোলোৱাসকলক অতিশীঘ্ৰে প্ৰতিষেধক গ্ৰহণৰো অনুৰোধ জনাইছে ফাউচিয়ে। ক’ভিড সংক্ৰমণৰ পৰা হাত সাৰিবলৈ তথা কৰ’না মহামাৰী নিয়ন্ত্ৰণৰ বাবে আমেৰিকা যুক্তৰাষ্ট্ৰক ব্যাপক হাৰত টিকাকৰণ কৰিবলৈ আহ্বান জনাইছে বিশ্বৰ অভিজ্ঞ স্বাস্থ্য বিষয়াসকলে। জনছ হ’পকিন্স বিশ্ববিদ্যালয়ৰ তথ্য অনুসৰি, আমেৰিকা যুক্তৰাষ্ট্ৰৰ প্ৰতিখন ৰাজ্যই বিগত সপ্তাহতকৈ ২৩জুলাইৰ পাছত ব্যাপক হাৰত কৰ’নাক্ৰান্তৰ সংখ্যা বৃদ্ধি পাইছে। ইফালে, আমেৰিকা যুক্তৰাষ্ট্ৰৰ ৰোগ নিয়ন্ত্ৰণ আৰু প্ৰতিৰোধ কেন্দ্ৰৰ (চিডিচি) মতে, ৩০খন ৰাজ্যই এতিয়াও তেওঁলোকৰ প্ৰায় ৫০শতাংশ নাগৰিকক টিকাকৰণ কৰিবলৈ বাকী আছে বুলি জানিবলৈ দিছে। পৰৱৰ্তী সময়ত আমেৰিকাই কৰ’নাৰ প্ৰত্যাহ্বানক কিদৰে প্ৰতিহত কৰে, সেয়াহে হ’ব লক্ষ্যণীয়!