ডিজিটেল ডেস্ক: ভাৰতলৈ আহিছে এক সুখবৰ। এপ'ল ইনকৰপৰেচনে ভাৰতীয় মূলৰ ছাবিহ খানক নতুন পৰিচালক বিষয়া হিছাপে নিযুক্তি প্ৰদান কৰিছে।কোম্পানীটোলৈ আগবঢ়োৱা অনবদ্য অৱদানৰ বাবে খানে লাভ কৰিছে এই সাফল্য।
আইফোন নিৰ্মাতা কোম্পানীটোয়ে এক বিবৃতিত কয় যে ছাবিহ খান এপ'লৰ সৈতে ৩০ বছৰৰ পৰা জড়িত হৈ আছে আৰু তেওঁ অপাৰেছনৰ উপ-সভাপতি হিচাপে কৰ্মৰত । ৫৮ বছৰীয়া খানে চলিত মাহৰ শেষৰ ফালে জেম্ছ উইলিয়ামছৰ ঠাইত কাৰ্যনিৰ্বাহ কৰিব।
১৯৯৫ চনত এপ'লত যোগদান কৰাৰ পূৰ্বে ছাবিহ খানে জি. ই. প্লাস্তিক্সত এপ্লিকেছন ডেপ্ল'ভমেন্ট ইঞ্জীনিয়াৰ আৰু মূল একাউণ্ট লিডাৰ হিছাপে কৰ্মৰত আছিল।
তেওঁ প্ৰায় তিনিটা দশক ধৰি কোম্পানীটোৰ সৈতে জড়িত হৈ আছে। যোৱা ৬ টা বছৰে তেওঁ এপ'লৰ সৈতে গুৰুত্বপূৰ্ণভাৱে জড়িত থকা বুলি জানিবলৈ পোৱা গৈছে ।
এপ'লৰ যোগানকাৰী দায়ৱদ্ধতা কাৰ্যসূচীও তদাৰক কৰি আছে ছাবিৰ খানে। যিয়ে শ্ৰমিক সুৰক্ষা শিক্ষা আৰু পৰিৱেশ বহনক্ষমতাৰ ওপৰত তদাৰক কৰে।
এপ'লে তেওঁৰ অৱদানক আলোকপাত কৰি কয় যে এপ'লৰ প্ৰতিটো গুৰত্বপূৰ্ণ সামগ্ৰী বজাৰলৈ প্ৰেৰণ কৰাত ছাবিহ খানৰ বৰঙণি অন্যতম।
উল্লেখ্য যে উত্তৰ প্ৰদেশৰ মোৰাদাবাদত ১৯৬৬ চনত ছাবিহ খানৰ জন্ম হৈছিল ।পঞ্চম শ্ৰেণীত পঢ়ি থকা অৱস্থাতেই তেওঁৰ পৰিয়াল ছিংগাপুৰলৈ স্থানান্তৰিত হয় । তেওঁ মেছাচুচেটছৰ মেডফোৰ্ডৰ টাফ্টছ বিশ্ববিদ্যালয়ৰ পৰা অৰ্থনীতি আৰু যান্ত্ৰিক অভিযান্ত্ৰিকত স্নাতক ডিগ্ৰী আৰু নিউয়ৰ্কৰ ট্ৰয়ৰ ৰেনচেলাৰ পলিটেকনিক ইনষ্টিটিউটৰ পৰা যান্ত্ৰিক অভিযান্ত্ৰিকত স্নাতকোত্তৰ ডিগ্ৰী লাভ কৰে।
Continue Reading
