গোসাইগাঁৱত বাঁহৰ সাঁকোৰ পৰা পৰি মহিলাৰ মৃত্যু; নিৰ্বাচনৰ পূৰ্বে দলং নিৰ্মাণ নকৰিলে ভোট বৰ্জনৰ হুংকাৰ গাঁওবাসীৰ

ডিজিটেল ডেস্ক : গোসাইগাঁৱৰ থুৰিবাৰি লালপাৰাত বাঁহৰ সাঁকোৰ পৰা পৰি মহিলাৰ মৃত্যু। নিৰ্বাচনৰ পূৰ্বে দলং নিৰ্মাণ নকৰিলে ভোট বৰ্জনৰ হুংকাৰ গাঁওবাসীৰ। 

গোসাইগাঁও মহকুমাৰ তথা বাওখুংৰী বিধানসভা সমষ্টিৰ অন্তৰ্গত থুৰিবাৰী লালপাৰা গাঁৱত বাঁহৰ সাঁকোৰ পৰা পৰি মহিলাৰ মৃত্যুক কেন্দ্ৰ কৰি গাঁওবাসীৰ মাজত তীব্ৰ প্ৰতিক্ৰিয়াৰ সৃষ্টি হৈছে৷ 

নিৰ্বাচনৰ পূৰ্বে দলং নিৰ্মাণ নকৰিলে ভোট বৰ্জনৰ হুংকাৰ দিছে গাঁওবাসীয়ে ৷ জানিব পৰামতে গাঁওখনত থকা মৰাজয়মা নদীৰ ওপৰত দলং নথকাৰ বাবে ৰাইজে বাঁহৰ সাঁকো সাজি যাতায়াত কৰি আহিছে৷ ফলত মাজে মাজতে গাঁৱৰ লোক পৰি আহত হয় ৷ 

যোৱা ৩১ মাৰ্চত মঙল বাৰে গাঁওখনৰ বাসিন্দা মাতি ছৰেন নামৰ এগৰাকী মহিলা সাঁকোৰে নদী পাৰ হওতে সাঁকোৰ পৰা পৰি মহিলাগৰাকী গুৰুতৰভাৱে আহত হয়৷ যোৱা নিশা মহিলাগৰাকীৰ মৃত্যু হয়৷ 

ইয়াৰ পাচতে ৰাইজৰ মাজত তীব্ৰ প্ৰতিক্ৰিয়া সৃষ্টি হৈছে৷ ৰাইজে অভিযোগ কৰিছে যে নিৰ্বাচনৰ পূৰ্বে প্ৰতিনিধিসকল ভোট বিচাৰি আহে যদিও নিৰ্বাচন পাৰ হোৱাৰ লগে লগে সকলো পাহৰি যায় ৷ এইবেলি নিৰ্বাচনৰ পূৰ্বে দলং নিৰ্মাণ নকৰিলে ভোট বৰ্জনৰ হুংকাৰ দিয়ে ৰাইজে ৷