সমস্ত উৎকণ্ঠাৰ অৱসান; ভাৰতত বিশ্ব কাপ দেখুৱাব জি টিভিয়ে

ডিজিটেল ডেস্ক : অৱশেষত স্বস্তি লাভ কৰিলে ভাৰতীয় ফুটবলপ্রেমীয়ে। সমস্ত উৎকণ্ঠাৰ অৱসান ঘটাই মূৰকত ভাৰতীয় ফুটবল অনুৰাগীয়ে আসন্ন বিশ্ব কাপৰ মেচ উপভোগৰ সুযোগ লাভ কৰিছে। জি এণ্টাৰটেইনমেণ্ট এণ্টাৰপ্ৰাইজ লিমিটেডৰ সৈতে চুক্তি হৈছে বিশ্ব ফুটবলৰ নিয়ামক সংস্থা ফিফাৰ। সোমবাৰে এই কথা জনাইছে জি এণ্টাৰটেইনমেণ্টে। এই চুক্তি ৮ বছৰীয়া। 

মাথোঁ এইবাৰৰ বিশ্ব কাপ ফুটবলেই নহয় ২০২৭ আৰু ২০৩১ চনৰ মহিলা বিশ্ব কাপ, ২০৩০ আৰু ২০৩৪ চনৰ পুৰুষৰ ফুটবল বিশ্ব কাপসহ মুঠ ৩৯টা আন্তর্জাতিক প্রতিযোগিতা দেখুৱাব জি টিভিয়ে। জি এণ্টাৰটেইনমেন্টে জনাইছে যে সম্প্রতি তেওঁলোকে ৪টা চেনেল আৰম্ভ কৰিছে। সেয়া হ'ল ইউনাইট ৮ স্প'র্টছ ১, ইউনাইট ৮ স্প'র্টছ ১ এইচ ডি, ইউনাইট ৮ স্প'ৰ্টছ ২ আৰু ইউনাইট ৮ স্প'র্টছ ২ এইচ ডি। এই ৪টা চেনেলত দেখা যাব বিশ্ব কাপৰ খেল। ইয়াৰ লগতে জি ফাইভ এপতো খেল চাব পাৰিব দর্শকে। 

মুঠ কিমান টকাত চুক্তি হৈছে সেয়া এই পর্যন্ত ৰাজহুৱাকৈ জানিব পৰা হোৱা নাই। অৱশ্যে, সূত্ৰৰ খবৰ অনুসৰি ভাৰতীয় মূল্যত প্রায় ৩৩২ কোটি টকাত ফিফাৰ সৈতে ৮ বছৰীয়া চুক্তিত স্বাক্ষৰ কৰিছে জি টিভিয়ে। ইমান টকা ভাৰতৰ আন কোনো সম্প্ৰচাৰকাৰীয়ে দিব খোজা নাই। শেহতীয়াকৈ জি টিভিৰ সৈতেই কথা-বার্তা চলিছিল ফিফাৰ। অৱশেষত সেয়া চূড়ান্ত হ'ল।

উৎস: দৈনিক জনমভূমি