যোগীক বিয়োগৰ অংক! বন্দুক লৈ যোগী আদিত্যনাথৰ সভাত কোন সোমাল?

ডিজিটেল ডেস্ক : নিজৰ কৰ্মকাণ্ডৰ বাবে প্ৰায়েই সংবাদ শিৰোনামত থকা যোগী আদিত্যনাথৰ জীৱনলৈ ভাবুকি আহিছে নেকি! মাজে-সময়ে বিতৰ্কত সোমাই পৰা উত্তৰ প্ৰদেশৰ মুখ্যমন্ত্ৰীগৰাকীৰ সভাত সোমাল এজন বন্দুকধাৰী ব্যক্তি। কটকটীয়া নিৰাপত্তাব্যৱস্থাৰ মাজতো এনেদৰে বন্দুকধাৰী লোকৰ প্ৰৱেশে যোগীৰ সুৰক্ষাৰ প্ৰতি ভাবুকি আনিছে।

ৰাজ্যখনৰ বস্তি জিলাৰ অটল বিহাৰী বাজপেয়ী প্ৰেক্ষাগৃহত আদিত্যনাথে এটা অনুষ্ঠানত ভাগ লৈছিল। সভাখনত স্থানীয় আৰক্ষী চকীৰ লগতে অন্য জিলাৰ আৰক্ষী মোতায়েন কৰা হৈছিল। মুখ্যমন্ত্ৰীগৰাকীৰ আগমনৰ ৪৫ মিনিট পূৰ্বে এগৰাকী লোক তেওঁৰ অনুজ্ঞাপত্ৰ থকা বন্দুক লৈ প্ৰেক্ষাগৃহত প্ৰৱেশ কৰে। প্ৰকাশিত তথ্য অনুসৰি জটশংকৰ শুক্লা নামৰ গৌৰ ব্লকৰ প্ৰতিনিধি এগৰাকী সভাগৃহত উপস্থিত হয়। শুক্লাৰ সৈতে জিতেন্দ্ৰ পাণ্ডে নামৰ এগৰাকী আত্মীয় তেওঁৰ অনুজ্ঞাপত্ৰ থকা বন্দুক লগত লৈ সভাখনলৈ গৈছিল। বস্তিৰ আৰক্ষী অধীক্ষক আশীষ শ্ৰীবাস্তৱে কয় যে, বস্তি জিলাত মুখ্যমন্ত্ৰীৰ এটা ভিআইপি অনুষ্ঠান আছিল। মুখ্যমন্ত্ৰী উপস্থিত হোৱাৰ ৪৫ মিনিট আগত মানুহজনে তেওঁৰ অনুজ্ঞাপত্ৰ থকা বন্দুক লৈ প্ৰেক্ষাগৃহত প্ৰৱেশ কৰে আৰু কৰ্তব্যৰত এজন চক্ৰ বিষয়াই তেওঁক দেখা পায়।
পাছত তেওঁক প্ৰেক্ষাগৃহৰ বাহিৰলৈ লৈ যোৱা হয় যদিও নিৰাপত্তাৰ খাতিৰত কৰ্তব্যৰত কেইবাজন আৰক্ষীৰ বিৰুদ্ধে শাস্তিমূলক ব্যৱস্থা গ্ৰহণ কৰা হয়। প্ৰাথমিক অৱস্থাত সাতগৰাকী আৰক্ষীৰ লোক কৰ্তব্যত গাফিলতি কৰাৰ বাবে শাস্তিৰ সন্মুখীন হ'ব বুলি জনায়। ইয়াৰে চাৰিগৰাকীক ইতিমধ্যে নিলম্বন কৰা হয়।