শেহতীয়াকৈ উত্তৰ প্ৰদেশৰ ঝান্সীত সন্দেহজনক পৰিস্থিতিত এগৰাকী মহিলাৰ মৃত্যু হয়। ২৭ বছৰীয়া মহিলাগৰাকীয়ে আত্মহত্যা কৰা বুলি দাবী তুলিছিল স্বামীগৃহই। পাছত মহিলাগৰাকীৰ পৰিয়ালে চিকিৎসালয়ত উপস্থিত হৈ সৃষ্টি কৰে হুলস্থুলীয়া পৰিস্থিতিৰ। পৰিয়ালৰ অভিযোগ যে যৌতুকৰ বাবেই কন্যাক হত্যা কৰিছে শহুৰ পৰিয়ালে। ঘটনা সন্দৰ্ভত তথ্য লাভ কৰাৰ লগে লগে আৰক্ষী ঘটনাস্থলীত উপস্থিত হয়। মৃত মহিলাগৰাকীৰ পৰিয়ালৰ লোকক শান্ত কৰি মৃতদেহটো মৰণোত্তৰ পৰীক্ষাৰ বাবে প্ৰেৰণ কৰে আৰক্ষীয়ে। লগতে উপযুক্ত তদন্তৰো আশ্বাস দিয়ে আৰক্ষীয়ে।
এতিয়া মৃত মহিলাগৰাকীৰ জীয়ৰীয়ে অংকন কৰা ছবি চাই হতবাক হৈছে সকলো। সন্দেহজনক মৃত্যুৰ কাহিনী ওলাল মহিলাগৰাকীৰ চাৰি বছৰীয়া কন্যাই অংকন কৰা ছবিখনৰ পৰাহে। ছবিখনত স্পষ্ট--- পুৰুষজনে মহিলাগৰাকীক কেনেকৈ মাৰপিট কৰিছিল আৰু কেনেকৈ আত্মহত্যৰ ৰূপ দিছিল সমগ্ৰ ঘটনাক৷
৪ বছৰীয়া কণমানিজনীয়ে সংবাদ মাধ্যমৰ আগত কৈ গ'ল - আগতে দেউতাই মোৰ মাক বহুত মাৰপিট কৰিছিল। কালিও মাক বহুত মাৰিলে, লাঠিৰে মাৰিছিল৷ তাৰ পাছত ডিঙি চেপি ধৰিলে। মই দেউতাক কৈছিলো মোৰ মাক মাৰিলে মই তোমাৰ হাতখন ভাঙি দিম, তাৰ পিছত দেউতাই মোৰ মুখখন বন্ধ কৰি দিলে। তাৰ পাছত দেউতাই মাক ওলমাই দিছিল।
২০১৯ চনত ঝান্সীত বাস কৰা সন্দীপ বুধৌলিয়াৰ সৈতে বিবাহপাশত আৱদ্ধ হৈছিল সোণালী নামৰ মহিলাগৰাকী। মৃত মহিলাগৰাকীৰ পিতৃয়ে জনোৱা মতে, বিয়াত নগদ ২০ লাখ টকা যৌতুক হিচাপে দিয়া হৈছিল।কন্যাৰ শহুৰেকে যৌতুক হিচাপে লগত গাড়ী বিচাৰিছিল। গাড়ী নিদিয়াৰ বাবেই জীয়ৰীক মাৰপিট কৰিছিল স্বামীগৃহই।
এতিয়া হত্যাকাৰীৰ কঠোৰ শাস্তি বিচাৰিছে সকলোৱে।
Continue Reading
