ডিজিটেল ডেস্কঃ বহু মানুহে ঘড়ীৰ প্ৰতি বৰ আকৰ্ষণ অনুভৱ কৰে। ঘড়ীক বৰ্তমান বিলাসী বস্তু হিচাপে দেখা যায়। হীৰা, মুকুতা আৰু সোণ-ৰূপেৰে নিৰ্মিত ঘড়ীত মানুহে লাখ-কোটি টকা খৰচ কৰে। শেহতীয়াকৈ এটা অতি পুৰণি ঘড়ীৰ দাম উঠিছে ১ কোটি ৪৭ লাখ টকাতকৈও অধিক। ৰলেক্স ঘড়ীৰ নিলামত এই অভাৱনীয় দৰ উঠা দেখিবলৈ পোৱা গৈছে।আচলতে এই ঘড়ীটোৱে ইতিহাসৰ কিছুমান স্মৰণীয় মুহূৰ্ত বহন কৰি আছে। এই ঘড়ীটো নিউয়ৰ্কত Christie's য়ে আয়োজন কৰা নিলামত দিয়া হৈছে।
এই ঘড়ীটো নাজী যুদ্ধ শিবিৰৰ 'গ্ৰেট এস্কেপ'ৰ সময়ত এজন ব্ৰিটিছ বন্দীয়ে পিন্ধিছিল। তেওঁৰ নাম আছিল জেৰাল্ড এমছন। ১৯৪৪ চনত জেৰাল্ড এমছন মিত্ৰশক্তিৰ সৈন্যৰ এটা দলৰ অংশ আছিল যিয়ে ষ্টেলাগ লুফ্ট তৃতীয় বন্দী শিবিৰৰ পৰা পলায়ন কৰাৰ দৰে সাহসী কাম কৰিছিল। ৱেবচাইট WION ৰ খবৰ অনুসৰি এই নিলামত এই Rolex ঘড়ীৰ দাম আছিল ১ লাখ ৮৯ হাজাৰ মাৰ্কিন ডলাৰ অৰ্থাৎ ১ কোটি ৪৭ লাখ ৬৫ হাজাৰ ৭৮৫ টকা। ব্ৰিটিছ নিলাম প্ৰতিষ্ঠান ক্ৰীষ্টিজৰ মতে এমছনে ছুইজাৰলেণ্ডৰ ৰলেক্সৰ পৰা এই ঘড়ীটোৰ অৰ্ডাৰ দিছিল।
ৰলেক্সে ৰেড ক্ৰছৰ জৰিয়তে বৰ্তমানৰ পোলেণ্ডৰ জাগান চহৰৰ ওচৰৰ এটা কাৰাগাৰৰ শিবিৰলৈ এই চিকচিকিয়া ক’লা ডায়েলযুক্ত ষ্টীলৰ ঘড়ীটো জেৰাল্ড এমছনৰ বাবে পঠিয়াইছিল। স্বাধীনতাৰ বাবে তেওঁৰ পৰিকল্পনা আৰু কাৰ্য্যকৰীকৰণত এই ঘড়ীটোৱে যথেষ্ট সহায় কৰিছিল। নিলাম গৃহটোৱে জনোৱা মতে ঘড়ীটোৱে বন্দীসকলে সুৰংগবোৰৰ মাজেৰে খোজ কাঢ়ি যোৱাৰ বাবে প্ৰয়োজনীয় সময় জনোৱাৰ লগতে শিবিৰৰ প্ৰহৰীৰ টহলদাৰী সময় কেতিয়া সেয়া জনাই আছিল। পলাতক অৱস্থাতো এমছনে পিন্ধিছিল এই ঘড়ীটো।
২০০৩ চনত ৮৫ বছৰ বয়সত (মৃত্যুলৈকে) এই ঘড়ীটো তেওঁৰ লগত ৰাখিছিল। এই ঘড়ী পিন্ধা জোৱানজনৰ ওপৰত এখন হলিউডৰ ছবিও নিৰ্মাণ কৰা হৈছে। অভিনেতা ষ্টিভ মেককুইনে এই ছবিখনত মুখ্য চৰিত্ৰত অভিনয় কৰিছিল। এই ছবিখন ১৯৬৩ চনৰ ছবিত মুক্তি পাইছিল। ছবিখনতো ষ্টিভ মেককুইনক ৰলেক্স ঘড়ী পিন্ধি দেখুওৱা হৈছিল,যিটো নিলাম কৰা ঘড়ীটোৰ সৈতে একে আছিল।
Continue Reading
