সংগম ঘাটত ১৯ লাখ লোকৰ স্নান, প্ৰয়াগৰাজত 'মাঘ মেলা' আৰম্ভ

ডিজিটেল ডেস্ক : পুহ পূর্ণিমা উপলক্ষে শনিবাৰৰ পৰা প্রয়াগৰাজত আৰম্ভ হৈছে 'মাঘ মেলা-২০২৬'। প্রয়াগৰাজৰ ত্রিবেণী সংগম উপকূলত আৰম্ভ হোৱা এই মেলাত শনিবাৰে লাখ লাখ লোকে ভিৰ কৰেগৈ। 

সংগম ঘাটত শনিবাৰৰ দিনটোত প্রায় ১৯ লাখ লোকে স্নান কৰে। উত্তৰ প্ৰদেশৰ এই ত্রিবেণী সংগম হৈছে গংগা, যমুনা আৰু পৌৰাণিক সৰস্বতী নৈৰ মিলনস্থলী। এই সংগম ঘাটটো শনিবাৰে পুৱাৰ পৰাই হৰ হৰ গংগে বৈদিক মন্ত্রোচ্ছাৰণ, নাম-কীর্তনেৰে উথলি উঠে। 

তদুপৰি লাখ লাখ লোকে পুণ্য অৰ্জনৰ অভিপ্ৰায়েৰে ঘাটত স্নান কৰে। উল্লেখযোগ্য যে পুহ পূর্ণিমা তিথি শুকুৰবাৰে সন্ধিয়া ৬ বাজি ৫৪ মিনিটত আৰম্ভ হয় আৰু শনিবাৰে বিয়লি ৫ বাজি ৩৫ মিনিটত সমাপ্ত হয়। ইফালে শনিবাৰৰ পৰা আৰম্ভ হোৱা মাঘ মেলা ১৫ ফেব্ৰুৱাৰী পর্যন্ত চলিব।

উৎসঃ দৈনিক জনমভূমি