ডিজিটেল ডেস্কঃ পাকিস্তান আৰু শ্ৰীলংকাত অনুষ্ঠিত হ’ব এছিয়া কাপ। এছিয়া ক্ৰিকেট কাউন্সিল (এচিচি)-এ এই খবৰ জনাইছে। এই বিষয়ে বহুদিন আলোচনা চলিছিল। শেষত এচিচিয়ে ঘোষণা কৰে যে এই খেলখন হাইব্ৰিড মডেলত খেলা হ’ব।
৩১ আগষ্টৰ পৰা আৰম্ভ হ’ব এছিয়া কাপ। ১৭ ছেপ্টেম্বৰত অনুষ্ঠিত হ’ব ফাইনেল। পাকিস্তানত মুঠ চাৰিখন খেল অনুষ্ঠিত হ’ব। বাকী সকলো খেল শ্ৰীলংকাত অনুষ্ঠিত হ’ব।
১৬ সংখ্যক এছিয়া কাপত মুঠ ছটা দলে খেলিব। ইহঁতক দুটা ভাগত ভাগ কৰা হয়। ভাৰত আৰু পাকিস্তান একেটা গ্ৰুপতে আছে। তেওঁলোকৰ সৈতে একেটা গ্ৰুপতে আছে কোৱালিফাইং ৰাউণ্ডৰ পৰা ওলাই অহা নেপাল। আনটো গ্ৰুপত আছে বাংলাদেশ, আফগানিস্তান আৰু শ্ৰীলংকা। এই এছিয়া কাপত মুঠ ১৩খন খেল অনুষ্ঠিত হ’ব।
আৰু পঢ়ক : আৰ্চাৰী বিশ্বকাপত উজ্বলিছে ভাৰত
দুটা গ্ৰুপৰ চাৰিটা দলে ছুপাৰ ফোৰ পৰ্যায়ত খেলাৰ সুযোগ পাব। তাত প্ৰতিটো দলে ইজনে সিজনৰ বিৰুদ্ধে খেলিব। তাৰ পৰা দুটা দলে ফাইনেল খেলিব। সেই মেচখন হ’ব ১৭ ছেপ্টেম্বৰত।
যোৱাবাৰ পাকিস্তানক পৰাস্ত কৰি শ্ৰীলংকাই এছিয়া কাপ জয়লাভ কৰিছিল। সেই সময়ত টি-২০ ক্ৰিকেট খেলা হৈছিল। এইবাৰ হ’ব ৫০ অভাৰৰ মেচ।
উল্লেখ্য যে ১৫ বছৰৰ মূৰত পাকিস্তানত হ’ব এছিয়া কাপ। পাকিস্তানৰ ব’ৰ্ডে কিছু মেচ পাকিস্তানত আৰু বাকী কেইখন শ্ৰীলংকাত খেলাৰ প্ৰস্তাৱ আগবঢ়ায়। এচিচিয়ে সেই কথা মানি লৈছিল। পাকিস্তানৰ মেচ হ’ব পাৰে লাহোৰত। সম্পূৰ্ণ সময়সূচী এতিয়াও ঘোষণা কৰা হোৱা নাই।
Continue Reading
