২০০০ডলাৰ, অলংকাৰৰ লোভত মাতৃয়ে বিক্ৰী কৰিলে ১৩বছৰীয়া কন্যাক

ৱাশ্বিংটনঃ এগৰাকী মাতৃৰ নিষ্ঠুৰ কাণ্ডই জোকাৰি গৈছে আমেৰিকা। আ-অলংকাৰৰ লোভত মাতৃয়ে গ’লে চৰম সিদ্ধান্ত।কোলা শুৱনি কৰা শিশুটিৰ প্ৰতি মাতৃৰ পাশৱিক আচৰণে উদঙাইছে আগৰণুৱা আমেৰিকাৰ প্ৰকৃত ৰূপ । ‘নৈৰ সমান ব’ব কোন আইৰ সমান হ’ব কোন?’ কথাষাৰ যেন এতিয়া গোকাট মিছা কথা! কথাষাৰৰ মৰ্মাৰ্থ থাকিলেও বা শুনিবলৈ শুৱলা হ’লেও বাস্তৱ প্ৰেক্ষাপটৰ সাময়িক এক ঘটনাই সকলোৰে চকু কপালত তুলিছে। আচৰিত যেন লাগিলেও, মাতৃৰ মমতাৰ আঁচলতে নিৰাপত্তাহীনতাত ভুগিছে এটি শিশু। এগৰাকী মাতৃৰ হীন কাৰ্যই উগ্বিগ্ন কৰি তুলিছে সচেতন মহলক। ঘটনাটো আমেৰিকা যুক্তৰাষ্ট্ৰৰ। আমেৰিকা যুক্তৰাষ্ট্ৰৰ ইণ্ডিয়ানা প্ৰদেশৰ এগৰাকী মহিলাই ধন আৰু অলংকাৰৰ লোভত তেওঁৰ ১৩বছৰীয়া কন্যাক বিক্ৰী কৰাৰ বাতৰি পোহৰলৈ আহিছে।

সংবাদ মাধ্যমত বাতৰিটো প্ৰকাশ পোৱাৰ লগে লগে প্ৰতিক্ৰিয়াৰ জোৱাৰ উঠিছে। উল্লেখ্য যে, ২০০০ ডলাৰ আৰু সোণৰ অলংকাৰৰ লোভত নিজ কন্যাক মাতৃয়ে জি কিউ ইয়া নামৰ এগৰাকী ব্যক্তিক বিক্ৰী কৰিছে মহিলাগৰাকীয়ে। ঘটনাটো পোহৰলৈ অহাৰ লগে লগে সৰব হৈ পৰিছে সচেতন মহল। মহিলাগৰাকীৰ এই অপৰাধৰ বাবে কাউণ্টিত শিশু বিক্ৰীৰ গোচৰো ৰুজু কৰা হৈছে। ‘দ্যা জাৰ্নেল গেজেট’ত প্ৰকাশ পোৱা মতে আৰক্ষীয়ে কিশোৰীগৰাকীক ক্ৰয় কৰা লোকজনক গ্ৰেপ্তাৰ কৰিছে। মহিলাগৰাকী আৰু তেওঁৰ স্বামীয়ে ১৩বছৰীয়া কিশোৰীগৰাকীক ২৭বছৰীয়া লোকজনৰ সৈতে বিয়াও পাতি দিয়ে বুলি পোহৰলৈ আহিছে। অৱশ্যে, এই অপৰাধৰ বাবে মহিলাগৰাকী আৰু তেওঁৰ স্বামীৰ বিৰুদ্ধে কেনেধৰণৰ আইনী ব্যৱস্থা গ্ৰহণ কৰে সেয়াহে হ’ব লক্ষ্যণীয়!