২০২১ বৰ্ষৰ বুকাৰ বঁটা অৰ্জন দক্ষিণ আফ্ৰিকাৰ লেখক ডেমন গালগুটৰ

ডিজিটেল ডেস্কঃ ২০২১ বৰ্ষৰ বুকাৰ বঁটা লাভ কৰিলে দক্ষিণ আফ্ৰিকাৰ লেখক ডেমন গালগুটে। বুকাৰ বঁটাৰ দৌৰত ডেমন গালগুটৰ লগতে আছিল আন এজন লেখক ৰিচাৰ্ড পাৱাৰছ। ৰিচাৰ্ড পাৱাৰছক অতিক্ৰম কৰি ডেমন গালগুটে অৰ্জন কৰিলে ২০২১ বৰ্ষৰ বুকাৰ বঁটা। ‘দ্য প্ৰমিজ’ৰ বাবে ডেমন গালগুটে এই সন্মানীয় বঁটা লাভ কৰিছে। ১৯৬৩ চনৰ ১২ নৱেম্বৰত দক্ষিণ আফ্ৰিকাৰ প্ৰেট’ৰিয়াত জন্মগ্ৰহণ কৰিছিল ডেমন গালগুটে।

১৭ বছৰ বয়সতে সাহিত্যৰ জগতখনত ভৰি দি তেওঁ নিজ প্ৰতিভাৰ পৰিচয় দিছিল। জীৱনৰ ১৭ বছৰ বয়সতে তেওঁ লিখি উলিয়াইছিল প্ৰথমখন উপন্যাস। ডেমন গালগুটৰ বুকাৰ বঁটা প্ৰাপ্ত ‘দ্য প্ৰমিজ’ত চাৰি দশকজুৰি দক্ষিণ আফ্ৰিকাৰ এটা বগা কৃষক পৰিয়ালৰ কাহিনী বৰ্ণনা কৰা হৈছে। পৰিয়ালটোৰ মাতৃগৰাকীৰ মৃত্যুৰ পূৰ্বে ইচ্ছা আছিল গোটেই জীৱন পৰিয়ালটোৰ বাবে কাম কৰা কৃষ্ণাঙ্গ মহিলাগৰাকীক এটা ঘৰ উপহাৰ দিয়া। কিন্তু মহিলাগৰাকীৰ সন্তানসকলে তেওঁলোকৰ মাতৃৰ ইচ্ছা অনুসৰণ কৰিব নে নাই তাক লৈ বিৰোধিতা কৰে। মূলতঃ বৰ্ণবৈষম্যক কেন্দ্ৰ কৰিয়েই উপন্যাসখন লিখা হৈছে বুলি জনাইছে বিশিষ্ট লেখকগৰাকীয়ে।

আৰু পঢ়কঃ সুৰাপান কৰি মৃত্যুমুখত পৰিল ৮ জনকৈ লোক! ক’ত?

উল্লেখ্য যে ডেমন গালগুটে ২০০৩ আৰু ২০১০ চনতো বুকাৰৰ বঁটাৰ বাবে মনোনীত হৈছিল যদিও তেওঁ সেই কৃতিত্ব অৰ্জন কৰাৰ পৰা বঞ্চিত হৈছিল। অৱশেষত ২০২১ বৰ্ষৰ বুকাৰ বঁটা অৰ্জন কৰি ডেমন গালগুটে আলোকিত কৰি তুলিলে নিজ সাহিত্যিক জীৱন।২০১৫ চনতো চানডে টাইমছ ফিকচন পুৰস্কাৰ লাভ কৰিছিল ডেমন গালগুটে।