২০২৩ চনৰ শেষলৈ মুদ্ৰাস্ফীতি ৪% তকৈ অধিক হোৱাৰ সম্ভাৱনা: মন্তব্য আৰবিআইৰ গৱৰ্ণৰ শক্তিকান্ত দাসৰ

আৰ বি আইৰ হিচাপ অনুসৰি ২০২৩-২৪ বিত্তীয় বৰ্ষত (২৪ বিত্তীয় বৰ্ষ) মুদ্ৰাস্ফীতি ৪%ৰ ওপৰত থকাৰ সম্ভাৱনা আছে। ইয়াৰ উপৰিও ২০২৩-২৪ বিত্তীয় বৰ্ষত বাস্তৱিক জিডিপি বৃদ্ধি ৬.৫% হ’ব বুলি অনুমান কৰা হৈছে। প্ৰথম ত্ৰৈমাসিকত জিডিপি ৮%, দ্বিতীয় ত্ৰৈমাসিকত ৬.৫%, তৃতীয় ত্ৰৈমাসিকত ৬% আৰু চতুৰ্থ ত্ৰৈমাসিকত ৫.৭% হ’ব পাৰে।

২০২২ চনৰ মে’ৰ পৰা ২০২৩ চনৰ ফেব্ৰুৱাৰীলৈ ৬ বাৰত ২.৫০% ৰেট বৃদ্ধি কৰিছে আৰ বি আইয়ে। এপ্ৰিল মাহত ৰেপো হাৰ ৬.৫০% অপৰিৱৰ্তিত ৰখা হৈছিল। ইয়াৰ পূৰ্বে ফেব্ৰুৱাৰী মাহত এই হাৰ ৬.২৫%ৰ পৰা ৬.৫০%লৈ বৃদ্ধি কৰা হৈছিল। ৰেপো ৰেটৰ ৰূপত মুদ্ৰাস্ফীতিৰ বিৰুদ্ধে যুঁজিবলৈ আৰ বি আইৰ হাতত আছে এক শক্তিশালী আহিলা। যেতিয়া মুদ্ৰাস্ফীতি অতি বেছি হয় তেতিয়া আৰ বি আইয়ে ৰেপো ৰেট বৃদ্ধি কৰি অৰ্থনীতিৰ ধনৰ প্ৰবাহ হ্ৰাস কৰাৰ চেষ্টা কৰে। ৰেপো ৰেট বেছি হ’লে আৰ বি আইৰ পৰা বেংকে যি ঋণ লাভ কৰে সেয়া ব্যয়বহুল হ’ব। বিনিময়ত বেংকে গ্ৰাহকৰ বাবে ঋণ ব্যয়বহুল কৰি তোলে। ইয়াৰ ফলত অৰ্থনীতিত ধনৰ প্ৰবাহ হ্ৰাস পায়। যদি ধনৰ প্ৰবাহ কমি যায়, তেন্তে চাহিদা কমি যায় আৰু মুদ্ৰাস্ফীতি কমি যায়।

একেদৰে অৰ্থনীতি বেয়া পৰ্যায়ৰ মাজেৰে পাৰ হ’লে অৰ্থনীতিৰ আৰোগ্যৰ বাবে ধনৰ প্ৰবাহ বৃদ্ধি কৰাৰ প্ৰয়োজন হয়। এনে পৰিস্থিতিত আৰ বি আইয়ে ৰেপো ৰেট হ্ৰাস কৰে। ইয়াৰ বাবে আৰ বি আইৰ পৰা ঋণ বেংকৰ বাবে সস্তা হৈ পৰে আৰু গ্ৰাহকেও কম হাৰত ঋণ লাভ কৰে। উদাহৰণস্বৰূপে কৰ’নাৰ সময়ত যেতিয়া অৰ্থনৈতিক কাৰ্যকলাপ স্তব্ধ হৈ পৰিল, তেতিয়া চাহিদা কমি আহিল। এনে পৰিস্থিতিত আৰ বি আইয়ে সুতৰ হাৰ হ্ৰাস কৰি অৰ্থনীতিৰ ধনৰ প্ৰবাহ বৃদ্ধি কৰিছিল।