ডিজিটেল ডেস্কঃ ভাৰতীয় নিৰ্বাচন আয়োগে ৰাজহুৱা কৰিলে বিজেপিৰ বাৰ্ষিক অডিট৷ প্ৰতিবেদন অনুসৰি ২০২১-২২ চনত শাসকীয় বিজেপি দলৰ মুঠ আয় ১৯১৭ কোটি টকাৰ পৰা ২০২২-২৩ চনত ২৩৬১ কোটি টকালৈ বৃদ্ধি পাইছে। একে সময়তে ২০২১-২২ চনত কংগ্ৰেছৰ মুঠ আয় ৫৪১.২৭ কোটি টকাৰ পৰা ২০২২-২৩ চনত ৪৫২.৩৭ কোটি টকালৈ হ্ৰাস পাইছে।
ভাৰতীয় জনতা পাৰ্টীয়ে ২০২২-২৩ চনত নিৰ্বাচনী বণ্ডৰ জৰিয়তে ১২৯৪.১৪ কোটি টকা লাভ কৰিছিল, যিটো বছৰটোত মুঠ আয়ৰ প্ৰায় ৫৪ শতাংশ আৰু বিজেপিৰ মূল প্ৰতিদ্বন্দ্বী কংগ্ৰেছ দলতকৈ সাতগুণ বেছি।বৃহস্পতিবাৰে (৮ ফেব্ৰুৱাৰী) নিৰ্বাচন আয়োগে ৰাজহুৱা কৰা বিজেপিৰ বাৰ্ষিক অডিট প্ৰতিবেদন অনুসৰি ২০২১-২২ চনত ১,৯১৭ কোটি টকাৰ পৰা ২০২২-২৩ বৰ্ষত শাসকীয় দলৰ মুঠ আয় ২৩৬১ কোটি টকালৈ বৃদ্ধি পাইছে।
দ্য হিন্দুৰ তথ্য অনুসৰি, দলটোৱে অনুদানৰ পৰা (নিৰ্বাচনী বণ্ডকে ধৰি) ২,১২০.০৬ কোটি টকা লাভ কৰাৰ বিপৰীতে বেংকৰ সুতৰ পৰা আয় ২৩৭.৩ কোটি টকা, যিটো পূৰ্বৰ বিত্তীয় বৰ্ষত ১৩৩.৩ কোটি টকা আছিল। নিৰ্বাচনত দলটোৱে ১,০৯২.১৫ কোটি টকা ব্যয় কৰিছিল, যিটো কংগ্ৰেছৰ ব্যয়তকৈ পাঁচগুণ বেছি। ২০২১-২২ চনত বিজেপিয়ে ব্যয় কৰিছিল ৬৪৫.৮৫ কোটি টকা।
বিজেপিৰ নিৰ্বাচনী ব্যয়ৰ ভিতৰত বিজ্ঞাপনৰ বাবে ব্যয় কৰা ৪৩২.১৪ কোটি টকা আৰু বিমান তথা হেলিকপ্টাৰ ভাড়াত ব্যয় কৰা ৭৮.২২ কোটি টকাৰ লগতে অন্যান্য খৰচো অন্তৰ্ভুক্ত। আৰ্থিক সাহায্য হিচাপে প্ৰাৰ্থীসকলক ৭৫.০৫ কোটি টকা দিয়াৰ বিপৰীতে সংবাদমেলত ব্যয় হৈছে ৭১.৬০ লাখ টকা।
আনহাতে, ২০২১-২২ চনত কংগ্ৰেছৰ মুঠ লাভ ৫৪১.২৭ কোটি টকাৰ পৰা ২০২২-২৩ চনত ৪৫২.৩৭ কোটি টকালৈ হ্ৰাস পাইছে। ২০২২-২৩ চনত কন্যাকুমাৰীৰ পৰা কাশ্মীৰলৈ ৰাহুল গান্ধীৰ ‘ভাৰত জোডো যাত্ৰা’ত ৭১.৮৩ কোটি টকা ব্যয় কৰে৷নিৰ্বাচনত ১৯২.৫৫কোটি টকা খৰচৰ বিপৰীতে নিৰ্বাচনী বণ্ডৰ জৰিয়তে দলটোক দিয়া অনুদান যোৱা বছৰ ২৩৬.০৯ কোটি টকাৰ পৰা ১৭১.০২ কোটি টকালৈ হ্ৰাস পায়৷।
যোৱা বছৰৰ জুলাই মাহত নিৰ্বাচন আয়োগে ৰাজনৈতিক দলসমূহে অনলাইনযোগে বিত্তীয় একাউণ্ট দাখিল কৰিব পৰাকৈ নতুন ৱেব পৰ্টেল মুকলি কৰিছিল।
আয়োগৰ মতে, ইয়াৰ দ্বৈত উদ্দেশ্য আছিল ৰাজনৈতিক দলসমূহে ভৌতিক প্ৰতিবেদন দাখিল কৰাৰ ক্ষেত্ৰত সন্মুখীন হোৱা অসুবিধাসমূহ দূৰ কৰিবলৈ সুবিধা প্ৰদান কৰা আৰু দ্বিতীয়তে, নিৰ্দিষ্ট/মানক আৰ্হিত বিত্তীয় বিৱৰণী সময়মতে দাখিল কৰাটো নিশ্চিত কৰা।
Continue Reading
