ডিজিটেল ডেস্কঃ ভাৰতীয় ৰিজাৰ্ভ বেংকে দেশবাসীক ৩০ ছেপ্টেম্বৰৰ ভিতৰত ২,০০০ টকীয়া নোট বেংকত সলনি কৰিবলৈ সময়সীমা বান্ধি দিছে। কিন্তু কোনোবাই যদি ৩০ ছেপ্টেম্বৰৰ ভিতৰত ২,০০০ টকীয়া নোট সলনি কৰিব নোৱাৰে তেন্তে তেওঁলোকৰ হাতত থকা সেই নোট অবৈধ হৈ পৰিব নেকি? এই প্ৰশ্নৰ উত্তৰ দিছে ভাৰতীয় ৰিজাৰ্ভ বেংকৰ (আৰবিআই) গভৰ্ণৰ শক্তিকান্ত দাসে ।
ভাৰতীয় ৰিজাৰ্ভ বেংকৰ গভৰ্ণৰগৰাকীয়ে সোমবাৰে কয় যে ২,০০০ টকীয়া নোট সলনি কৰিবলৈ "পৰ্যাপ্ত" সময় আছে। তেওঁ লগতে কয় যে ৩০ ছেপ্টেম্বৰত নোট সলনিৰ সময়সীমা শেষ হোৱাৰ পিছতো ২,০০০ টকীয়া নোট অবৈধ হৈ নপৰিব। ইয়াৰ বাবে জনতাই আৰু কিছু সময় পাব।তেওঁ লগতে কয় যে নোটবোৰ সলনি কৰাৰ বাবে এটা নিৰ্দিষ্ট সময়সীমা এইবাবেই বান্ধি দিয়া হৈছে যাতে জনতাই তেনে নোট সলনি কৰিবলৈ তৎপৰ হয়। তেওঁ অৱশ্যে নোট সলনি কৰাৰ সময়সীমা পুনৰ কেতিয়ালৈ বৃদ্ধি কৰা হ’ব পাৰে সেই বিষয়ত কোনো মন্তব্য প্ৰকাশ নকৰিলে।
ইপিনে ভাৰতীয় ষ্টেট বেংকেপ্ৰকাশ কৰা মতে স্লিপ অবিহনেই বেংকত ২,০০০ টকাৰ নোট জমা কৰিব পাৰিব। যদি আপুনি ২,০০০ টকীয়া নোট বেংকত ঘূৰাই দিব বিচাৰে,তেন্তে আপুনি বেঙ্কত কোনো ধৰণৰ পৰিচয় পত্ৰও প্ৰদৰ্শন কৰিব নালাগে।
এয়াও জনা গৈছে যে বেঙ্কত আপোনাৰ একাউণ্ট নাথাকিলেও আপুনি তেনে বেঙ্কৰ শাখালৈ যাব পাৰে আৰু ২,০০০ টকাৰ নোট সলনি কৰিব পাৰে।এবাৰত এগৰাকী লোকে সৰ্বাধিক ২০,০০০ টকা পৰ্যন্ত নোট সলনি কৰিব পাৰিব।
Continue Reading
