ডিজিটেল ডেস্কঃ ৰাষ্ট্ৰপতি দ্ৰৌপদী মুৰ্মুৱে শনিবাৰে নতুন দিল্লীৰ ৰাষ্ট্ৰপতি ভৱনত আয়োজিত এক অনুষ্ঠানত প্ৰাক্তন প্ৰধানমন্ত্ৰী পি ভি নৰসিংহ ৰাও আৰু চৌধুৰী চৰণ সিং, কৃষি বিজ্ঞানী এম এছ স্বামীনাথন আৰু বিহাৰৰ প্ৰাক্তন মুখ্যমন্ত্ৰী কৰ্পুৰী ঠাকুৰক মৰণোত্তৰভাৱে দেশৰ সৰ্বোচ্চ অসামৰিক সন্মান ভাৰতৰত্ন প্ৰদান কৰে।
এইবাৰ চৰকাৰে ভাৰতৰত্ন প্ৰদান কৰিছে ভাৰতীয় জনতা পাৰ্টিৰ পিতামহ স্বৰূপ তথা প্ৰাক্তন উপ-প্ৰধানমন্ত্ৰী এল কে আদৱানীকো । ৰাষ্ট্ৰপতি দ্ৰৌপদী মুৰ্মুৱে ৰাষ্ট্ৰপতি ভৱনত চাৰিগৰাকী ব্যক্তিৰ পৰিয়ালক ভাৰতৰত্ন প্ৰদান কৰাৰ বিপৰীতে প্ৰবীণ বিজেপি নেতা এল কে আদৱানীক তেওঁৰ বাসগৃহত ভাৰতৰত্ন প্ৰদান কৰা হ'ব।
শাৰীৰিক অসুস্থতাৰ বাবে ৰাষ্ট্ৰপতি ভৱনত উপস্থিত হ’ব নোৱাৰা ৯৬ বছৰীয়া লাল কৃষ্ণ আদৱানীক দেওবাৰে ৰাষ্ট্ৰপতিগৰাকীয়ে তেওঁৰ বাসগৃহলৈ গৈ তাতেই তেওঁক আনুষ্ঠানিকভাৱে প্ৰদান কৰিব ভাৰত ৰত্ন সন্মান। উল্লেখ্য, কেন্দ্ৰীয় চৰকাৰে এইবাৰ মুঠ ৫ জন ব্যক্তিলৈ আগবঢ়াইছে ভাৰত ৰত্ন সন্মান।
প্ৰয়াত নৰসিংহ ৰাও, চৌধুৰী চৰণ সিং, কৰ্পুৰী ঠাকুৰ আৰু স্বামীনাথনৰ হৈ তেওঁলোকৰ আত্মীয়সকলে ভাৰতৰত্ন গ্ৰহণ কৰিছিল। প্ৰাক্তন প্ৰধানমন্ত্ৰী নৰসিংহ ৰাওৰ পুত্ৰ পি ভি প্ৰভাকৰ ৰাৱে ৰাষ্ট্ৰপতিৰ পৰা তেওঁৰ পিতৃক প্ৰদান কৰা সন্মান গ্ৰহণ কৰে। চৌধুৰী চৰণ সিঙৰ নাতি আৰু ৰাষ্ট্ৰীয় লোক দলৰ (আৰএলডি) সভাপতি জয়ন্ত চৌধুৰীয়ে ৰাষ্ট্ৰপতি মুৰ্মুৰ পৰা এই সন্মান গ্ৰহণ কৰে।
স্বামীনাথনৰ জীয়ৰী নিত্যা ৰাও আৰু কৰ্পুৰী ঠাকুৰৰ পুত্ৰ ৰামনাথ ঠাকুৰে ৰাষ্ট্ৰপতিৰ পৰা ভাৰতৰত্ন সন্মান গ্ৰহণ কৰিছিল।
এই অনুষ্ঠানত প্ৰধানমন্ত্ৰী নৰেন্দ্ৰ মোডী, গৃহমন্ত্ৰী অমিত শ্বাহ, উপ-ৰাষ্ট্ৰপতি জগদীপ ধনখড়কে ধৰি কেইবাজনো কেন্দ্ৰীয় মন্ত্ৰী উপস্থিত থাকে। ইয়াৰ লগতে বিজেপিৰ সভাপতি জে পি নাড্ডা, কংগ্ৰেছৰ সভাপতি মল্লিকাৰ্জুন খাৰ্গে আৰু অন্যান্য গণ্যমান্য ব্যক্তিসকল উপস্থিত আছিল।
Continue Reading
