৫ কেজি চাউলেৰে কাম নিসিজিব: উত্তৰ প্ৰদেশত ভোট বিচাৰি যোৱা মন্ত্ৰীক ফেপেৰি পাতি ধৰিলে মহিলাই

ডিজিটেল ডেস্ক: উত্তৰ প্ৰদেশত আৰম্ভ হৈছে বিধানসভা নিৰ্বাচন৷ ইতিমধ্যে, ৰাজ্যখনত প্ৰথম পৰ্যায়ৰ নিৰ্বাচন অনুষ্ঠিত হৈ গৈছে৷ আৰু, ছটা পৰ্যায়ৰ নিৰ্বাচন অনুষ্ঠিত হ’বলৈ বাকী আছে ৰাজ্যখনত৷ জানিব পৰা মতে, চলিত বিধানসভা নিৰ্বাচনৰ সময়ত উত্তৰ প্ৰদেশত ভাৰতীয় জনতা পাৰ্টীৰ নেতা আৰু ইয়াৰ সহযোগী দলবোৰে বিধানসভা দখল কৰিবলৈ যথেষ্ট কষ্টস্বীকাৰ কৰিবলগীয়া হৈছে৷ আনকি, ৰাইজৰ মাজলৈ ভোট বিচাৰি যোৱাৰ লগে লগে, বিজেপি আৰু মিত্ৰশক্তিয়ে ৰাইজৰ প্ৰশ্ন আৰু অভিযোগত বিৰক্ত হৈ পৰিছে৷ শেহতীয়াকৈ উত্তৰ প্ৰদেশ চৰকাৰৰ কাৰাগাৰ মন্ত্ৰী জয় কুমাৰ সিং জেকীৰ সৈতে ঘটিল এক অবাঞ্চিত ঘটনা৷ যোগী চৰকাৰৰ মন্ত্ৰী জয় কুমাৰ জেকীয়ে এইবেলি ফতেহপুৰৰ বিন্দকী আসনৰ পৰা বিজেপিৰ সহযোগী আপনা দলৰ প্ৰাৰ্থী হিচাপে প্ৰতিদ্বন্দ্বিতা আগবঢ়াইছে৷ নিৰ্বাচনী প্ৰচাৰৰ সময়ত যেতিয়া জেকীয়ে ভোটাৰৰ ওচৰলৈ গৈছিল, তেতিয়া মহিলাৰ এটা দলে তেওঁৰ বিৰুদ্ধে অভিযোগ উত্থাপন কৰিছিল। জেকী আৰু তেওঁৰ সমৰ্থকসকলে তেওঁলোকক কামৰ বিনিময়ত ৫ কিলোগ্ৰাম শস্য দিয়াৰ কথা মনত পেলাই দিছিল। মন্ত্ৰীগৰাকীৰ সমুখতে অভিযোগ কৰি মহিলাসকলে স্পষ্টকৈ কয় যে, ৫ কিলোগ্ৰাম শস্যৰে আমাৰ জীৱনক নিৰ্ধাৰণ কৰিব খুজিছে নেকি? জেকী আৰু তেওঁৰ সমৰ্থকসকলে মহিলাগৰাকীৰ সেই প্ৰশ্নৰ উত্তৰ দিব পৰা নাছিল৷ উল্লেখযোগ্য যে, আমি আপোনাক কওঁ যে কৰ’না মহামাৰীৰ সময়ত উত্তৰ প্ৰদেশ চৰকাৰে প্ৰধানমন্ত্ৰী অন্ত্যোদয়া যোজনাৰ অধীনত কেইমাহমানৰ বাবে প্ৰতি মাহে ৫ কিলোগ্ৰামকৈ খাদ্যশস্য বিনামূলীয়াকৈ দিছিল। দেখা গৈছে যে, উত্তৰ প্ৰদেশত বিজেপি আৰু তেওঁলোকৰ মিত্ৰদলৰ প্ৰাৰ্থীসকলে ভোটাৰৰ মাজলৈ যাওঁতে চৰকাৰৰ সফলতাৰ খতিয়ান বুলিবলৈ বিশেষ একো নাথাকে, তেতিয়া তেওঁলোকে বিনামূলীয়া শস্য আঁচনিৰ কথাকে ক’বলৈ আৰম্ভ কৰে৷