ৰাজ্যসভাত বিজেপি সাংসদৰ দাবী: নিয়োগৰ সুবিধা সৃষ্টি কৰা বাবে আম্বানী, আদানিক পূজা কৰা উচিত

ডিজিটেল ডেস্ক: ৰাজ্যসভাৰ সাংসদ তথা জ্যেষ্ঠ বিজেপি সাংসদ আলফন্স কান্নানথানামৰ এটা মন্তব্য দেশজুৰি চৰ্চিত হৈছে৷ তেওঁ কয়, নিয়োগৰ পথ দেখুওৱা বাবে ভাৰতৰ প্ৰখ্যাত উদ্যোগপতি আম্বানী, আদানিক নিয়োগ সৃষ্টিৰ বাবে উপাসনা কৰা উচিত৷ যিসকল লোকে ধন বিনিয়োগ কৰি চাকৰি সৃষ্টি কৰে আৰু তেওঁলোকক সন্মান জনোৱা প্ৰয়োজন৷ ৰাজ্যসভাত ২০২২-২৩ বিত্তীয় বৰ্ষৰ কেন্দ্ৰীয় বাজেট সন্দৰ্ভত হোৱা বিতৰ্কৰ সময়ত বিজেপি সাংসদ কে জে আলফন্সে কয় যে, নিযুক্তিৰ সুযোগ সৃষ্টিৰ ক্ষেত্ৰত শীৰ্ষ উদ্যোগপতিসকলৰ কাম আৰু অৱদানক স্বীকৃতি দিব লাগিব। কেৰালাৰ সাংসদজনে আৰু কৈছিল যে মুকেশ আম্বানী আৰু গৌতম আদানিৰ দৰে উদ্যোগপতিসকলক ইয়াৰ বাবে পূজা কৰিব লাগিব। তেওঁ লগতে কয় যে, কোনোবাই মোক পুঁজিপতিৰ মুখপাত্ৰ বুলি অভিযোগ কৰিব পাৰে। কিন্তু, এই দেশত চাকৰি সৃষ্টি কৰা ৰিলায়েন্স হওক, আম্বানী হওক, আদানি বা আন কোনোৱেই হওক তেওঁলোকক উপাসনা কৰিবই লাগিব। কিয়নো, তেওঁলোকে চাকৰি প্ৰদান কৰে৷ গোলকীয় অসমতা এক সত্য বুলি স্বীকাৰ কৰি আলফন্সে বিৰোধীপক্ষক সমালোচনা কৰি কয় যে দেশৰ দুজন লোকৰ সম্পদ বৃদ্ধি পাইছে। সাংসদজনে উল্লেখ কৰে যে ইলন মাস্ক, লেৰী পেজ, জেফ বেজোছ আৰু বিল গেটছৰ দৰে বিশ্বব্যাপী কৰ্পোৰেট ব্যৱসায়ীসকলৰ সম্পদ বৃদ্ধি পাইছে। টেছলাৰ মুখ্য কাৰ্যবাহী বিষয়া মাস্কৰ উদাহৰণ দাঙি ধৰি আলফন্সে কয় যে তেওঁৰ সম্পত্তি ১০১৬ শতাংশ বৃদ্ধি পাইছে। গুগলৰ প্ৰতিষ্ঠাপক লেৰী পেজৰ সম্পদ ১২৬ শতাংশ বৃদ্ধি পাইছে। বেজোছৰ সম্পদ ৬৭ শতাংশ বৃদ্ধি পাইছে। এই সকলো শীৰ্ষ ১০ জনৰ ভিতৰত আটাইতকৈ কম হৈছে বিল গেটছ। তেওঁৰ সম্পত্তিৰ ৩০ শতাংশ বৃদ্ধি হৈছে৷ আলফন্সে তেতিয়া শাসকীয় চৰকাৰৰ সাফল্যৰ পৰিপূৰক হৈ কয় যে, চৰকাৰে বিগত সাত বছৰত পূৰ্বৰ চৰকাৰবোৰে লাভ কৰা সফলতাতকৈ অধিক সফলতা অৰ্জন কৰিছে।