মৰাণৰ পিছত এইবাৰ ৰাজপথ কঁপাব মটকে, জনজাতিকৰণৰ দাবীৰে ২৬ ছেপ্টেম্বৰত ৫০ হাজাৰ মটক ৰাইজে কঁপাব লাহোৱালৰ আকাশ বতাহ

ডিজিটেল ডেস্কঃ এইবাৰ গৰজি উঠিছে মটক জনগোষ্ঠী। জনজাতিকৰণৰ দাবীৰে ২৬ ছেপ্টেম্বৰত ৫ বজাত ৫০ হাজাৰ মটক জনগোষ্ঠীৰ ৰাইজে কঁপাব ডিব্ৰুগড়ৰ লাহোৱালৰ আকাশ বতাহ। 

জিলাখনৰ বিভিন্ন প্ৰান্তৰ পৰা সদৌ অসম মটক যুৱ ছাত্র সন্মিলনৰ নেতৃত্বত ৫০ হাজাৰ পুৰুষ মহিলাই একত্ৰিত হৈ জোঁৰ সমদল বাহিৰ কৰি উত্তাল প্ৰতিবাদ সাব‍্যস্ত কৰি আকাশ বতাহ কঁপাই তুলিব লাহোৱালত। 

আজি সদৌ অসম মটক যুৱ ছাত্র সন্মিলনৰ নেতৃবৰ্গ‌ই লাহোৱালত সংবাদমাধ‍্যমৰ আগত কয় যে দীৰ্ঘ দিনৰ পৰাই ডিব্ৰুগড়ৰ বিভিন্ন প্ৰান্তত মটক জনগোষ্ঠীৰ লোকৰ ঘৰে ঘৰে গৈ প্ৰচাৰ চলাইছে সদৌ অসম মটক যুৱ ছাত্র সন্মিলনৰ কৰ্মকৰ্তাই। এই বিশাল প্ৰতিবাদী সমদল যোৱা ২২ ছেপ্টেম্বৰ তাৰিখে অনুষ্ঠিত কৰাৰ কথা আছিল যদিও হাৰ্টথ্ৰৱ জুবিন গাৰ্গৰ অকাল মৃত্যুৰ বাবে সেই দিনৰ কাৰ্যসূচী স্থগিত ৰাখি ২৬ চেপ্তেম্বৰত অনুষ্ঠিত কৰাৰ সিদ্ধান্ত লোৱা হৈছিল। 

জনজাতিকৰণকলৈ কোনো কাৰণতেই আপোচ কৰা নহব বুলি মন্তব্য দিয়াৰ লগতে কয় যে, মটক জনগোষ্ঠীৰ জনজাতিকৰণৰ দাবীৰে ১৯৪০ চনতেই প্ৰতিষ্ঠা লাভ কৰিছিল সদৌ অসম মটক যুৱ ছাত্র সন্মিলনে। 

সুদীৰ্ঘ ৮৫ বছৰ ধৰি কোনো এখন চৰকাৰে মটক জনগোষ্ঠীটোক জনজাতিকৰণ নকৰিলে। বিজেপি চৰকাৰ শাসনলৈ অহাৰ পূৰ্বেই মটক জনগোষ্ঠীৰ লগতে ছয় জনগোষ্ঠীক জনজাতিকৰণ কৰিম বুলি প্ৰতিশ্ৰুতি দিছিল। শাসনলৈ আহিলে ৬ মাহৰ ভিতৰত মটক জনগোষ্ঠীৰ লগতে ছয় জনগোষ্ঠীক জনজাতিকৰণ কৰাৰ প্ৰতিশ্ৰুতি দিছিল। কিন্তু শাসনৰ গাদীত বহা দহ বছৰ অতিক্ৰম কৰাৰ পিছতো আজিৰ পৰ্যন্ত জনজাতি কৰণ নকৰিলে। চৰকাৰৰ লগত বহু আলোচনা কৰাৰ পিছতো গুৰুত্ব নিদিলে চৰকাৰে।