ডিজিটেল ডেস্কঃ কোৱা হয় জন্ম,মৃত্যু, বিবাহত মানুহৰ হাত নাথাকে। পতি-পত্নীৰ যোৰা বোলে ওপৰৱালাই বনাই ৰাখে। কোনোবাই পিছে বহু চেষ্টাৰ মূৰতো নিজৰ বিয়াখন পাতিবগৈ নোৱাৰে আনহাতে কেতিয়াবা এজন মানুহৰে তিনি-চাৰিগৰাকী পত্নী থকা দেখা যায়। কেতিয়াবা মানুহে বিয়া পাতিও অভিলেখ গঢ়ে।
তেনে এজন লোক হৈছে কানাডাত (Canada) বাস কৰা উইনষ্টন ব্লেকমোৰ। উইনষ্টন ব্লেকমোৰৰ বয়স হৈছে ৬৫ বছৰ। আপুনি শুনি আচৰিত হ'ব যে উইনষ্টন ব্লেকমোৰে এতিয়ালৈকে এবাৰ বা দহবাৰ নহয় ২৭ বাৰকৈ বিবাহপাশত আৱদ্ধ হৈছে। তেওঁৰ ২৭গৰাকী পত্নীৰ বিপৰীতে আছে ১৫০টা সন্তান। সমগ্ৰ বিশ্বতে তেওঁক বহু বিবাহবাদী হিচাপে জনা যায়। শেহতীয়াকৈ তেওঁৰ প্ৰথম পত্নীৰ জীয়ৰী মেৰী জেন ব্লেকমোৰে উইনষ্টনৰ জীৱন সম্পৰ্কে কিছুমান কথা কৈছিল।
মেৰী জেনে কৈছিল যে ''আমাৰ বৃহৎ সংখ্যক ভাই-ভনী আছে। যেতিয়া মোৰ বয়স ১৪ বছৰ আছিল তেতিয়া মোৰ দেউতাৰ ১২ গৰাকী পত্নী আছিল। সেই সময়ত আমাৰ ৪০ জন ভাই-ভনী আছিল। পিছত মোৰ দেউতা উইনষ্টন ব্লেকমোৰে আৰু কেইবাবাৰো বিয়া পাতে আৰু আমাৰ ভাই-ভনীৰ সংখ্যা ১৫০ লৈ বৃদ্ধি পাইছিল। ২০১৭ চনত মোৰ দেউতাৰ বিৰুদ্ধে বেআইনী বহুবিবাহৰ অভিযোগ আৰোপ কৰা হৈছিল আৰু তাৰপাছত ২০১৮ চনত তেওঁক ছয় মাহৰ বন্দীত্বৰ শাস্তি দিয়া হৈছিল। কানাডাৰ বহুবিবাহৰ ১০০ বছৰৰ ইতিহাসত এইটো প্ৰথম শাস্তি আছিল।'' কিন্তু মেৰীয়ে লগতে কয় যে দেউতাই কেৱল আইনীভাৱে মোৰ মাক বিয়া কৰাইছিল আৰু বাকী মহিলাসকলৰ সৈতে তেওঁ 'আধ্যাত্মিক বিবাহ' কৰিছিল। উল্লেখ্য যে উইনষ্টনে প্ৰথমবাৰ ১৮ বছৰ বয়সত বিবাহপাশত আৱদ্ধ হৈছিল।
Continue Reading
