৭০ বছৰে দেশক কি দিলে কংগ্ৰেছে? উত্তৰ দিলে জ্যেষ্ঠ নেতাই

জয়পুৰ : বিজেপিৰ বিৰুদ্ধে সৰৱ হৈ পৰিছে জ্যেষ্ঠ কংগ্ৰেছ নেতা তথা ৰাজস্থানৰ মুখ্যমন্ত্ৰী অশোক গেহলট। বিগত ৭০ বছৰে কংগ্ৰেছে কি কৰিলে বুলি বিজেপিয়ে কৰি অহা প্ৰশ্নৰ প্ৰত্যুত্তৰ দি জ্যেষ্ঠ নেতাগৰাকীয়ে কয়, দেশৰ আটাইতকৈ পুৰণি ৰাজনৈতিক দলটোৱে গণতন্ত্ৰ অটুট ৰাখিছে আৰু দেশক অবিভাজিত ৰূপত ধৰি ৰাখিছে। যাৰ ফলতে আজি নতুন চৰকাৰ প্ৰতিষ্ঠা হ’ব পাৰিছে।

তেওঁ লগতে কয় যে, কংগ্ৰেছ নেতাসকলৰ ত্যাগ তথা তেওঁলোকৰ কাৰাবৰণৰ কাৰণেই দেশে স্বাধীনতা লাভ কৰিছিল। দেশৰ প্ৰাক্তন প্ৰধানমন্ত্ৰী ৰাজীৱ গান্ধীৰ জন্মদিৱস উপলক্ষে আয়োজিক এক অনুষ্ঠানত অংশগ্ৰহণ কৰি এই মন্তব্য কৰে গেহলটে। তেওঁ কয় যে, এই প্ৰশ্ন কৰা সহজ যে, বিগত ৭০ বছৰে কি কৰিলে? এই ৭০ বছৰত কংগ্ৰেছে দেশ আৰু গণতন্ত্ৰ অটুট ৰাখিছে।

যাৰ বাবে পাকিস্তানৰ দৰে ভাৰত সামৰিক শাসকৰ অধীনলৈ যাবলগীয়া হোৱা নাই। তেওঁ লগতে কয় যে, চৰকাৰ আহি থাকিব গৈ থাকিব। বৰ্তমানৰ চৰকাৰখনো এইবাবেই প্ৰতিষ্ঠা হৈছে যে, দেশত গণতন্ত্ৰ শক্তিশালী হৈ আছে।