ডিজিটেল ডেস্কঃ নামটো ভোটাৰ তালিকাত নাছিল। গতিকে ছত্তীশগড়ৰ নবৈৰ উৰ্ধৰ বৃদ্ধজনে ইমান দিনে ভোটাধিকাৰ সাব্যস্ত কৰিব নোৱাৰিছিল। অৱশেষত ভোটাৰ তালিকা সংশোধন কৰিবলৈ যাওঁতে এই বিষয়টো ভোটগ্ৰহণ কৰ্মীসকলৰ দৃষ্টিগোচৰ হয়।
ভোটাৰ তালিকাত ৯৩ বছৰত প্ৰথমবাৰৰ বাবে প্ৰৱেশ কৰিছে শ্বেৰ সিং হেডকোৰ নাম। ৰাজ্যখনত বিধানসভা নিৰ্বাচনৰ বতৰ চলি আছে। জীৱনত প্ৰথমবাৰৰ বাবে গণতান্ত্ৰিক অধিকাৰ প্ৰয়োগ কৰাৰ পূৰ্বে বৃদ্ধজন উৎফুল্লিত হৈ পৰিছে।
শ্বেৰ সিঙৰ ঘৰ ছত্তীশগড়ৰ ভাইশংকৰ গাঁৱত। এই গাঁওখন সেই ৰাজ্যৰ ভানুপ্ৰত্পপুৰ বিধান সভা সমষ্টিৰ অন্তৰ্গত। দেশৰ প্ৰথম স্বাধীনতা দিৱস নিজ চকুৰে দেখা এই বৃদ্ধজনে এবাৰো ভোটাধিকাৰ সাব্যস্ত কৰিব নোৱাৰিলে।
শেহতীয়াকৈ নিৰ্বাচনী আয়োগে নিৰ্বাচনমুখী ছত্তীশগড়ত ভোটদানৰ হাৰ বৃদ্ধিৰ বাবে কেইবাটাও পদক্ষেপ গ্ৰহণ কৰিছে। তাৰ অংশ হিচাপে বুথ পৰ্যায়ৰ বিষয়াসকলে দুৱাৰে দুৱাৰে গৈ নতুন ভোটাৰৰ নাম সংগ্ৰহ কৰি তালিকা প্ৰস্তুত কৰিছে। সেই কামটো কৰি থাকোঁতে শ্বেৰ সিঙৰ নাতিৰ সূত্ৰই গম পালে যে বৃদ্ধজনৰ ভোটাধিকাৰ নাই।
সেই অঞ্চলৰ নিৰ্বাচন আয়োগৰ ভাৰপ্ৰাপ্ত বিষয়া ৰাজেন্দ্ৰ কোছমাই কয় যে চৰকাৰী নথি-পত্ৰত কিছু ভুলৰ বাবে ইমান দিনে ভোটাৰ তালিকাত বৃদ্ধজনৰ নাম নাহিল। সকলো প্ৰক্ৰিয়া শুধৰণি কৰি সম্পূৰ্ণ কৰা হৈছে বুলিও তেওঁ কয়। সকলো ঠিকে থাকিলে চলিত বৰ্ষৰ শেষত জীৱনত প্ৰথমবাৰৰ বাবে ছত্তীশগড় বিধানসভা নিৰ্বাচনত ভোটাধিকাৰ প্ৰয়োগ কৰিব শ্বেৰ সিঙে।
Continue Reading
