বাঁহ গছত বগলীৰ বিয়লি মেল, নাৰায়ণপুৰত এজাক বগলীয়ে দৃষ্টি কাঢ়িছে বাটৰুৱাৰ

ডিজিটেল ডেস্ক : লখিমপুৰ জিলাৰ নাৰায়ণপুৰৰ গণক দলনীত এজাক বগলীৰ দৃষ্টিনন্দন পৰিৱেশে বাটৰুৱাৰ মন পুলকিত কৰিছে।

গাঁওখনৰ মাজেৰে পাৰ হৈ যোৱা ধলপুৰ-শিমলুগুৰি পথৰ দাঁতিত এডৰা বাঁহনিত বিগত বছৰ বছৰ ধৰি জাক জাক বগলীয়ে আশ্ৰয় লৈ আহিছে।

পৰিয়ালৰ সদস্যৰ দৰে বগলীজাকৰ আশ্ৰয়ত সহযোগ কৰি আহিছে গাঁওবাসীয়ে। স্থানীয় ৰাইজে জানিবলৈ দিয়া মতে, কোনো দুষ্কৃতিকাৰীক প্ৰৱেশ কৰিবলৈ নিদিয়ে গাঁওখনৰ লোকসকলে। এক কথাত ক'বলৈ গ'লে বগলীজাক সংৰক্ষণ কৰি আহিছে গাঁওবাসীয়ে।

খাদ্যৰ সন্ধানত পুৱাই খেতি পথাৰলৈ উৰা মাৰে বগলীজাক। ইবাহৰ পিছত সিবাহ পোৱালিৰ জন্ম দিয়াৰ পিছত পোৱালিক লালন-পালন কৰাৰ দৃষ্টিনন্দন দৃশ্যই সকলোৰে মন পুলকিত কৰি তুলিছে। উক্ত পথেৰে পাৰ হৈ যোৱা প্ৰতিজন বাটৰুৱাই ক্ষণিকৰ বাবে সেই স্থানত ৰৈ আনন্দ উপভোগ কৰাৰ লগতে বগলী সংৰক্ষণৰ বাবে গাঁওবাসীক শলাগ লৈছে।

অসমৰ উপৰি বগলীজাকৰ দৃষ্টিনন্দন পৰিৱেশ উপভোগ কৰিবলৈ কাষৰীয়া অৰুণাচল প্ৰদেশৰ পৰাও পক্ষীপ্ৰেমীৰ দৈনিক আগমন ঘটিছে। উল্লেখ্য যে উক্ত অঞ্চলত বিভিন্ন প্ৰজাতিৰ বগলীৰ লগতে ঋতুভেদে নানা ধৰণৰ দেশী-বিদেশী পক্ষীৰো আগমন ঘটে।

উৎসঃ দৈনিক জনমভূমি