আদিংগিৰিৰ পাছত কালাপানীতো ঘৰে ঘৰে বিলালে উচ্ছেদৰ জাননী

ডিজিটেল ডেস্ক : গুৱাহাটীৰ আদিংগিৰি পাহাৰত বাস কৰা বেদখলকাৰীক সেই স্থান এৰি যাবৰ বাবে প্রশাসনে জাননী জাৰি কৰাৰ পাছত এইবাৰ ফটাশিল সংৰক্ষিত বনাঞ্চলৰ কালাপানী এলেকাত প্রশাসনে উচ্ছেদৰ জাননী জাৰি কৰিছে।

উল্লেখযোগ্য যে আদিংগিৰি পাহাৰৰ বেদখল উচ্ছেদ কৰাটো নিশ্চিত কৰি ইতিমধ্যে প্রশাসনে বেদখলকাৰীসকলক সেই স্থান এৰি আঁতৰি যাবলৈ সাতদিন সময়সীমা নির্ধাৰণ কৰি জাননী প্রদান কৰিছিল। আদিংগিৰিৰ পাছতে কালাপানী এলেকাতো উচ্ছেদ অভিযান চলোৱাটো নিশ্চিত হৈছে। বেদখলকাৰীসকলক এসপ্তাহৰ সময়সীমা নির্ধাৰণ কৰি কালাপানী এলেকাতো জাননী জাৰি কৰা হৈছে।

ঘৰে ঘৰে প্ৰশাসনৰ মানুহ গৈ গৃহস্থৰ হাতে হাতে উচ্ছেদৰ পূৰ্বে নিজেই সেই স্থান এৰি আঁতৰি যাবৰ বাবে জাননী দি আহিছে। যি ঘৰৰ মানুহ লগ পোৱা নাই তেনে লোকৰ ঘৰত জাননীখন আঁৰি থৈ আহিছে প্ৰশাসনৰ প্ৰতিনিধিয়ে। সেই জাননীত তেওঁলোকে কোনো মানুহ লগ পোৱা নাই বুলিও উল্লেখ কৰি দিছে। উল্লেখযোগ্য যে ফটাশিল সংৰক্ষিত বনাঞ্চলৰ হাবি ভাঙি ঘৰ সজাৰ লগতে ৰাস্তা-পদূলি নিৰ্মাণ কৰিছিল বেদখলকাৰীসকলে। সাধাৰণ টিনৰ ঘৰৰ পৰা আৰম্ভ কৰি বহুকেইটা পকী ঘৰো নিৰ্মাণ কৰি বেদখল কৰিছিল সংৰক্ষিত বনাঞ্চলত।

বেদখল কৰা স্থানক নামকৰণ কৰিছিল বনফুল নগৰ হিচাপে। দেওবাৰে এই এলেকাৰ শতাধিক লোকৰ ঘৰত জাননী জাৰি কৰি এসপ্তাহৰ ভিতৰত স্বেচ্ছাই এই স্থান এৰি যাবলৈ নিৰ্দেশ দিয়ে। অন্যথা উচ্ছেদ চলোৱাৰ সকীয়নি দিয়া হয়। প্রণিধানযোগ্য যে এই এলেকাত বাস কৰা লোকসকলে বিগত দুটা দশক ধৰি সেই স্থানত বসবাস কৰি থকা বুলি উল্লেখ কৰিছে। আনকি বিদ্যুৎ বিভাগে এই অবৈধ জনাঞ্চলত বিদ্যুৎ যোগানো ধৰি আহিছে।