বাতিল হ'ল তামুলপুৰৰ ডিমিলাপাৰ সাৰ্বজনীন দূৰ্গা পূজাৰ সকলো ধৰণৰ সাংস্কৃতিক অনুষ্ঠান

ডিজিটেল ডেস্কঃ ৬৫সংখ্যক সাৰ্বজনীন ডিমিলাপাৰ দূৰ্গা পূজা বিগত বৰ্ষৰ দৰে এই বৰ্ষও ছয় দিনীয়া বৰ্ণাঢ্য কাৰ্য্যসূচীৰে অনুষ্ঠিত হোৱাৰ কথা আছিল। প্ৰচলিত নিয়মেৰে পূজাৰ দিনবোৰত বিভিন্ন ধৰ্মীয় আচাৰ-অনুষ্ঠানৰ লগতে সাংস্কৃতিক সন্ধিয়াৰো আয়োজন কৰা হৈছিল।কিন্তু অসমবাসীৰ হিয়াৰ আমঠু তথা প্ৰাণৰ জুবিন গাৰ্গৰ অকাল প্ৰয়াণত সমগ্ৰ ৰাজ্য জুৰি শোকৰ ছাঁ নামি আহিছে।

এই পৰিপ্ৰেক্ষিতত আয়োজক সমিতিয়ে সংবাদ মাধ্যমৰ আগত জনাই যে এইবাৰ দূৰ্গা পূজাৰ সাংস্কৃতিক সন্ধিয়াৰ সকলো বোৰ অনুষ্ঠান বাতিল কৰা হ’ল। যদিও পূজাৰ ধৰ্মীয় কাৰ্য্যসূচী পূৰ্ণৰূপে আগৰ পৰাই নিৰ্ধাৰিত অনুসৰি সম্পন্ন কৰা হ’ব।

আয়োজকসকলে জনাইছে, “অসমবাসীৰ গভীৰ শোকত ভাগ ল'বলৈ আৰু জুবিন গাৰ্গলৈ শেষ শ্রদ্ধা জ্ঞাপন কৰিবলৈ এই সিদ্ধান্ত লোৱা হৈছে।”আনহাতে ডিমিলাপাৰ সাৰ্বজনীন দূৰ্গা পূজাৰ আয়োজক সমিতিয়ে জুবিন গাৰ্গৰ মৃত্যুৰ তদন্ত সঠিক ৰূপত কৰিবলৈ আহ্বান জনাইছে অসমৰ মুখ্যমন্ত্ৰী ডঃ হিমন্ত বিশ্ব শৰ্মাক ।