পৰ্ণ জগতত ভৰি দিয়া নাই অর্চিতা ফুকনে

ডিজিটেল ডেস্ক :ডিব্ৰুগড় আৰক্ষীয়ে কৃত্রিম বুদ্ধিমত্তা সঁজুলি ব্যৱহাৰ কৰি এগৰাকী মহিলাৰ মৰ্ফড স্পষ্ট ছবি সৃষ্টি আৰু প্ৰচাৰৰ অপৰাধত তিনিচুকীয়াৰ এজন যান্ত্রিক অভিযন্তাক গ্ৰেপ্তাৰ কৰিছে।

এই ঘটনাই সমগ্ৰ অসমজুৰি ব্যাপক ক্ষোভৰ সৃষ্টি কৰিছে। প্ৰতিম বৰা নামৰ অভিযুক্তজনে উন্নত AI প্লেটফৰ্ম ব্যৱহাৰ কৰি তেওঁৰ প্ৰাক্তন মহিলা সহপাঠী অর্চিতা ফুকনৰ মুখ পর্ন'গ্রাফিক কন্টেন্টত ছুপাৰইম্প'জ কৰি মিছাকৈ মহিলাগৰাকীক প্রাপ্তবয়স্ক বিনোদন উদ্যোগত জড়িত বুলি প্ৰদৰ্শন কৰিছিল।

ছ'চিয়েল মিডিয়া ব্যৱহাৰকাৰীয়ে এই কাৰ্যৰ নিন্দা কৰিছে। কিন্তু আৰক্ষীৰ তদন্তত নিশ্চিত হৈছে যে কন্টেন্টখিনি সম্পূর্ণৰূপে জাল আছিল আৰু ব্যক্তিগত সংঘাতৰ পাছত কেৱল মহিলাগৰাকীৰ সুনাম নষ্ট কৰাৰ উদ্দেশ্যে তৈয়াৰ কৰা হৈছিল। মহিলাগৰাকীৰ ভায়েকৰ আনুষ্ঠানিক অভিযোগৰ পাছত শনিবাৰৰ নিশা প্রতিমক গ্ৰেপ্তাৰ কৰা হৈছিল।

ডিব্ৰুগড় জিলাৰ আৰক্ষী অধীক্ষক (ভাৰপ্ৰাপ্ত) চিজাল আগৰৱালে দেওবাৰে সংবাদ মাধ্যমক জানিবলৈ দিয়া তথ্য অনুসৰি চাইবাৰ ক্রাইম ইউনিটৰ দ্রুত তদন্তৰ ফলত তিনিচুকীয়াৰ পৰা প্রতিম বৰাক গ্ৰেপ্তাৰ কৰা হৈছে। অভিযুক্ত প্রতিম বৰাই AI ছফটৱেৰ ব্যৱহাৰ কৰি ভিক্টিমৰ ছবি ব্যৱহাৰেৰে কেইবাটাও অশ্লীল কন্টেন্ট আৰু পর্ন'গ্রাফিক সামগ্রী তৈয়াৰ কৰিছিল। ইয়াক এনেদৰে দেখুওৱা হৈছিল যেন মহিলাগৰাকীয়ে পর্ন ইণ্ড্ৰাষ্ট্রীত যোগদান কৰিছে, যিটো তদন্তৰ সময়ত সম্পূৰ্ণৰূপে মিছা বুলি প্রমাণিত হৈছে।

তদন্তত প্রকাশ পাইছে যে বৰাই জাল ছবি প্রস্তুত কৰিবলৈ Desyre, Open Art আৰু Midjourneyসহ অত্যাধুনিক AI-চালিত ছবি সৃষ্টি প্লেটফৰ্ম ব্যৱহাৰ কৰিছিল। মৰ্ফড কন্টেন্ট সৃষ্টি কৰাৰ উপৰি তেওঁ একাধিক জাল ছ'চিয়েল মিডিয়া প্রফাইল আৰু Gmail একাউন্ট স্থাপন কৰি বিভিন্ন প্লেটফর্মত এই সামগ্রী আপলোড আৰু বিতৰণ কৰিছিল। যিটো প্রতিশোধৰ পৰা আৰম্ভ হৈছিল সেয়া মুনাফাৰ পৰিকল্পনালৈ পৰিণত হৈছিল, যেতিয়া বৰাই আৱিষ্কাৰ কৰিছিল যে তেওঁ ছাবস্ক্রিপশ্যন-ভিত্তিক প্রাপ্তবয়স্ক প্লেটফৰ্মৰ জৰিয়তে জাল কণ্টেণ্টৰ পৰা ধন উপাৰ্জন কৰিব পাৰে।

'প্ৰাৰম্ভিকভাৱে তেওঁ কেৱল মহিলাগৰাকীক বদনাম কৰিবলৈ চেষ্টা কৰিছিল, কিন্তু যেতিয়া তেওঁ তাইৰ মৰ্ফড কন্টেন্ট ব্যৱহাৰ কৰি ছাবস্ক্রিপশ্যন ভিত্তিক প্রাপ্তবয়স্ক কণ্টেণ্টৰ জৰিয়তে ধন উপাৰ্জন কৰিবলৈ আৰম্ভ কৰিছিল তেতিয়া তেওঁ লোভী হৈ পৰিছিল আৰু ইয়াক অব্যাহত ৰাখিবলৈ লৈছিল।' আৰক্ষী অধীক্ষকগৰাকীয়ে জনায়। জেৰাৰ সময়ত অপৰাধৰ আৰ্থিক উদ্দেশ্য স্পষ্ট হৈছিল, আৰক্ষীয়ে আৱিষ্কাৰ কৰিছিল যে বৰাই ইতিমধ্যে মর্ফড কণ্টেণ্টৰ জৰিয়তে প্রায় ১০ লাখ টকা উপার্জন কৰিছিল।

এই দুষ্ট কর্মই কেৱল মহিলাগৰাকীৰ গোপনীয়তা লংঘন কৰাই নহয়, তেওঁ আমেৰিকা যুক্তৰাষ্ট্ৰত বাস কৰি আছে আৰু প্রাপ্তবয়স্ক মিডিয়াত জড়িত বুলি মিছা তথ্যৰ ব্যাপক প্রচাৰো কৰিছিল। গ্ৰেপ্তাৰৰ সময়ত আৰক্ষীয়ে অভিযুক্তৰ পৰা যথেষ্ট ডিজিটেল প্রমাণ জব্দ কৰিছে, যাৰ ভিতৰত আছে দুটা ম'বাইল ফ'ন, এটা হার্ড ডিস্ক, এটা লেপটপ, এটা টেবলেট, এটা পেন ড্রাইভ, এটা কার্ড ৰিডাৰ, কেইবাটাও ছিম কার্ড আৰু একাধিক ক্রেডিট-ডেবিট কার্ড।

ডিব্ৰুগড় আৰক্ষী থানাত ভাৰতীয় ন্যায় সংহিতা (BNS)ৰ একাধিক ধাৰাৰ অধীনত ৰুজু কৰা হৈছে, য'ত আছে ধাৰা ৩৩৬(৪), ৩৫৬(২), ৭৪, ৭৫, ২৯৪ আৰু ৩৫১(২)। এই বিধানসমূহে চাইবাৰ হায়ৰানি, মানহানি, অশ্লীলতা আৰু গোপনীয়তা আক্ৰমণকে ধৰি বিস্তৃত অপৰাধ সামৰি লৈছে। অভিযুক্ত বৰাক আৰক্ষীয়ে আদালতত হাজিৰ কৰাই ৫ দিনৰ জিম্মাত লৈছে। জনসাধাৰণৰ প্ৰতি কঠোৰ সতর্কবাণী উচ্চাৰণ কৰি আগৰৱালে কয় যে তথ্য জনাৰ পিছতো যিকোনো ব্যক্তিক মানহানিকৰ কণ্টেণ্ট ফৰৱাৰ্ড কৰা, শ্বেয়াৰ কৰা বা তাৰ ওপৰত অপমানজনক মন্তব্য কৰা দেখা গ'লে আইনী পৰিণতি ভোগ কৰিবলগীয়া হ'ব।

উৎসঃ দৈনিক জনমভূমি