অৰুণাচলত ৩২টা গুৰুত্বপূৰ্ণ প্রকল্প, লাডাখৰ পৰা ভার্চুৱেলী উদ্বোধন প্ৰতিৰক্ষা মন্ত্ৰী ৰাজনাথ সিঙৰ

ডিজিটেল ডেস্ক : অৰুণাচল প্রদেশত নির্মিত ৩২টা গুৰুত্বপূর্ণ আন্তঃগাঁথনি প্রকল্প দেওবাৰে উদ্বোধন কৰে কেন্দ্রীয় প্রতিৰক্ষা মন্ত্রী ৰাজনাথ সিঙে। লাডাখত অনুষ্ঠিত এক অনুষ্ঠানৰ পৰা অৰুণাচলৰ এই প্রকল্পকেইটা তেওঁ ভার্চুৱেলী উদ্বোধন কৰে।

উক্ত অনুষ্ঠানতে প্রতিবক্ষা মন্ত্রীজনে দেশৰ বিভিন্ন ৰাজ্যত নির্মিত মুঠ ১২৫টা আন্তঃগাঁথনি প্রকল্প একেদৰে উদ্বোধন কৰে। উল্লেখযোগ্য যে চীন সীমান্তৱর্তী অৰুণাচল প্রদেশত কেন্দ্ৰীয় চৰকাৰে ইতিমধ্যে কৌশলগতভাৱে গুৰুত্বপূৰ্ণ বিভিন্ন প্রকল্প চলাই আছে। 

দেওবাৰে উদ্বোধন কৰা সীমান্ত পথ সংস্থা (বি আৰ অ')ৰ ৩২টা প্রকল্পও কৌশলগতভাৱে অতি গুৰুত্বপূর্ণ। এই ৩২টা প্রকল্পৰ উদ্বোধনী উপলক্ষে অৰুণাচলৰ পশ্চিম চিয়াং জিলাৰ আলোত ৪৪ ব'ৰ্ডাৰ ৰ'ৰ্ডছ টাস্ক ফ'র্চে এটা অনুষ্ঠানৰো আয়োজন কৰিছিল। ৰাজ্যিক আইন আৰু ন্যায় মন্ত্রী কেণ্টো জিনিয়ে কয় যে এই প্রকল্পকেইটাই ভাৰত-চীন সীমান্তৰ চি য়োমি আৰু আপাৰ চিয়াং জিলালৈ সেনা প্ৰেৰণ কৰাত সহায় কৰিব। তদুপৰি, প্রকল্পকেইটাই যিকোনো পৰিস্থিতিতে সেনাক সষ্টম আৰু প্রস্তুত হৈ থকাৰ লগতে তাৎক্ষণিকভাৱে সেনা সঞ্চালন কৰাত সহায় কৰিব। লগতে সেনা বাহিনীৰ উপৰি স্থানীয় জনতাকো যাতায়াত আৰু যোগাযোগৰ ক্ষেত্ৰত প্রকল্পকেইটাই সহায় কৰিব বুলি তেওঁ আশা কৰে। 

অৰুণাচল প্রদেশত প্রতিৰক্ষা মন্ত্রীয়ে উদ্বোধন কৰা প্ৰকল্পসমূহৰ ভিতৰত আছে টাটো-মেঢুকা পথত থকা ৩৫ মিটাৰ দৈর্ঘ্যৰ চেনে নাল্লা দলং, ১৫ মিটাৰ দৈর্ঘ্যৰ ৰিতুবাং দলং, ৪০ মিটাৰ দৈর্ঘ্যৰ বাবুং দলং, ৪০ মিটাৰ দৈৰ্ঘ্যৰ ছেয়ো নাল্লা দলং, দিম্মে-মিগিং পথ আদি। তদুপৰি, আন কেইবাটাও পথ আৰু হেলিপেড প্রকল্পও আছে।

উৎসঃ দৈনিক জনমভূমি