কাজিৰঙাত পৰিভ্ৰমী চৰাই চিকাৰৰ বাবে অহা ৫ জন লোকক গ্ৰেপ্তাৰ বন বিভাগৰ

ডিজিটেল ডেস্কঃ কাজিৰঙাৰ ষষ্ঠ সংযোজনৰ অন্তৰ্গত ভোলাকাটা বিলত চৰাই চিকাৰৰ বাবে অহা ৫ জন চিকাৰীক আটক কৰে বন বিভাগে ।

ভোলাকাটা বিলত দুষ্প্ৰাপ্য চৰাই ধৰিবলৈ জাল পতাৰ খবৰৰ ভিত্তিত বিশ্বনাথ ঘাটৰ চেন্ট্ৰেল ৰেঞ্জ আৰু পানীভৰালৰ অপৰাধ অনুসন্ধান ৰেঞ্জৰ বন বিষয়াৰ নেতৃত্বত যোৱা এটা দলে ঘটনাস্থলীত ৫ জন ব্যক্তিক হাতে-লোটে আটক কৰে । 

তেওঁলোকৰ পৰা এটা জীৱন্ত 'কটন পিগমি গুজ' নামৰ দুষ্প্ৰাপ্য চৰাই, এটা মাছ মৰা জাল, ২ টা মোবাইল ফোন, ১ টা টৰ্চ লাইট আৰু ২ টা মোনা জব্দ কৰে বন বিভাগে । এই চৰাইৰ প্ৰজাতিটো বন্যপ্ৰাণী সুৰক্ষা আইন, ১৯৭২-ৰ অনুসূচী-১-ৰ অধীনত পৰে বুলি বন বিভাগে জানিবলৈ দিয়ে। 

উক্ত চৰাইটো আফগানিস্তানৰ পৰা অহা পৰিভ্ৰমী চৰাই। আটকাধীন ৫ জন ব্যক্তি ক্ৰমে, ছাইফুল ইছলাম, আনোৱাৰ হুছেইন, তামছাৰ আলী, আবুল হুছেইন, ফকীৰ আলী ।