ডিব্ৰুগড় জিলাত কলেৰা ৰোগীৰ প্ৰাদুৰ্ভাৱক লৈ হাই এলাৰ্ট জাৰি ; স্বাস্থ্য বিভাগৰ যুটীয়া সঞ্চালকৰ সংবাদমেল সম্বোধন

ডিজিটেল ডেস্ক : ডিব্ৰুগড় জিলা খনৰ বিভিন্ন ঠাইত কলেৰা ৰোগৰ প্ৰাদুৰ্ভাৱৰ সন্দৰ্ভত আজি দিনৰ ১ বজাত ডিব্ৰুগড় জিলা স্বাস্থ্য বিভাগৰ যুটীয়া সঞ্চালক ডা° তৃষ্ণা বৰাই এক সংবাদমেল সম্বোধন কৰে।

এই সংবাদমেলৰ জৰিয়তে তেওঁ অৱগত কৰে যে চাবুৱাৰ দিনজয় চাহ বাগিচাৰ পকা লাইন আৰু দুলীয়াজানৰ সমীপৰ গজালবষ্টীত বৰ্তমানৰ লৈকে কলেৰা ৰোগৰ প্ৰাদুৰ্ভাৱ হৈছে। বৰ্তমানৰ লৈকে চাবুৱা আদৰ্শ চিকিৎসালয়ত ১০ গৰাকী আৰু টেঙাখাট আদৰ্শ চিকিৎসালয়ত ১৯ গৰাকী কলেৰা ৰোগী চিনাক্ত কৰাৰ লগতে বৰ্তমানৰ লৈকে ৫ গৰাকী কলেৰা ৰোগীৰ মৃত্যু মুখত পৰিছে বুলি অৱগত কৰে যুটীয়া সঞ্চালক গৰাকীয়ে।

ইয়াৰ উপৰিও চাবুৱাৰ দিনজয় চাহ বাগিচাৰ পকা লাইনৰ টিউবেল সমূহত অত‍্যাধিক বিজানু চিনাক্ত কৰাৰ বাবে টিউবেল সমূহ ছীল কৰাৰ লগতে উক্ত লাইনটোত কোৱাৰেন্টাইন ঘোষণা কৰাৰ উপৰিও কলেৰা ৰোগৰ বাবে সমগ্ৰ ডিব্ৰুগড় জিলা খনতেই স্বাস্থ্য বিভাগৰ ফালৰ পৰা হাই এলাৰ্ট জাৰি কৰিছে বুলি অৱগত কৰে স্বাস্থ্য বিভাগৰ যুটীয়া সঞ্চালক ডা° তৃষ্ণা বৰাই।