সলনি হ'ব পাৰে GMCHৰ অধ্যক্ষ ; ডাঃ অচ্যুত বৈশ্যক শাস্তিমুলক বদলিৰ সম্ভাৱনা

ডিজিটেল ডেস্কঃ কিমান ভয়ংকৰ কাণ্ড সংঘটিত হ’ব পাৰে এখন চৰকাৰী হাস্পতালত। চিকিৎসাকৰ্মীৰ চৰম গাফিলতিৰ পৰিণতিত সংঘটিত হ’ব পাৰে কিমান হৃদয়বিদাৰক ঘটনা। য’ত সুৰক্ষিত নহয় নৱজাতকৰ প্ৰাণ।

গুৱাহাটী চিকিৎসা মহাবিদ্যালয় হাস্পতালত চিকিৎসাকৰ্মীৰ গাফিলতিত মৃত্যু ঘটিল এটি নৱজাতকৰ। গুৰুতৰভাৱে আহত হৈছে আন এটি দেৱশিশু। জিএমছিএইছৰ এনআইচিইউত নৱজাতক ৰখা বিচনাৰ পৰা পৰি মৃত্যু ঘটিছে এটি দেৱশিশুৰ।

হাস্পতালখনৰ এনআইচিইউৰ বিচনাৰ পৰা তলত পৰিছিল দুটা শিশু। ইয়াৰে এটি শিশুৰ ডিঙিত ৰছী লাগি ওলমি মৃত্যু হয়। এনে ভয়ংকৰ ঘটনাই স্বাভাৱিকতে জোকাৰি গৈছে সমগ্ৰ ৰাজ্য।

GMCHৰ কৰ্মীৰ চৰম অৱজ্ঞা আৰু অসাৱধানতাৰ বাবেই নৱজাতক সন্তানক হেৰুৱাই শোকত ভাগি পৰিছে ভুক্তভোগী পিতৃ। ঘাতক GMCHত হেৰুৱাবলগা হ’ল কোলাৰ সন্তানক।

পিছে এনে অবিশ্বাস্য আৰু হৃদয়বিদাৰক ঘটনাৰ পাছতো চৰম নিৰ্বিকাৰ স্থিতিত GMCHৰ অধ্যক্ষ ডাঃ অচ্যুৎ চন্দ্ৰ বৈশ্য। এই ঘটনাক এক সাধাৰণ দুৰ্ঘটনা বুলি চৰম গা এৰা দিয়া মন্তব্য অধ্যক্ষজনৰ। GMCHৰ অধ্যক্ষৰ এনে চৰম দায়িত্বহীন মন্তব্যই যেন দুগুণে বঢ়াই তুলিলে ভুক্তভোগীৰ শোক কিম্বা ক্ষোভ। নৱজাতকৰ মৃত্যুৰ এনে ঘটনাক লৈয়ো যেন ন্যূনতম সংবেদনশীলতা নাই অধ্যক্ষজনৰ। এই ভয়ংকৰ ঘটনাৰ বিৰুদ্ধে জাঙুৰ খাই উঠিছে বিভিন্নজন বিৰোধী নেতা।

উল্লেখযোগ্য যে সোমবাৰে নিশা মুখ্যমন্ত্ৰী উপস্থিত হয় গুৱাহাটী চিকিৎসা মহাবিদ্যালয় হাস্পতালত । মুখ্যমন্ত্ৰীৰ নিৰ্দেশৰ পাছতেই তৎপৰ ভঙাগড় আৰক্ষী।DCP মৃণাল ডেকাৰ নেতৃত্বত ঘটনাৰ সৈতে জড়িত কেইবাজনকো আটক কৰি সোধাপোচা আৰক্ষীৰ ।

আনহাতে মুখ্যমন্ত্ৰী নিৰ্দেশৰ পাছতেই গ্ৰেপ্তাৰ হ'ব পাৰে NICUৰ কেইবাগৰাকীও চিকিৎসক, নাৰ্চ, কৰ্মচাৰী। ঘোচখোৰ কৰ্মচাৰী বিৰুদ্ধে অভিযান তীব্ৰতৰ কৰিছে আৰক্ষীয়ে। ট্ৰ'লি পুলাৰৰ নামত ধন সংগ্ৰহ কৰা কৰ্মচাৰী সোধাপোচা আৰক্ষীৰ । ভুক্তভূগীয়ে ঘোচখোৰ কৰ্মচাৰীৰ বিৰুদ্ধে মুখ্যমন্ত্ৰীক দিছিল অভিযোগ । সেই অভিযোগৰ ভিত্তিত আৰক্ষীয়ে আৰম্ভ কৰিছে তদন্ত।

ঘোচখোৰ কৰ্মচাৰীক শীঘ্ৰে গ্ৰেপ্তাৰৰ নিৰ্দেশ মুখ্যমন্ত্ৰীৰ।কৰ্মচাৰীক ৫০০-১০০০ টকা দিলেহে পায় ট্ৰ'লি পুলাৰ আৰু চাহ খোৱাৰ নামত প্ৰতিজন কৰ্মচাৰীক দিব লাগে টকা । নৱজাতকৰ পিতৃ মাতৃৰ পৰা কিদৰে GMCHৰ একাংশ কৰ্মচাৰীয়ে সংগ্ৰহ কৰে টকা সংবাদ মাধ্যমৰ আগত দাঙি ধৰিছে বিৱৰণ ভুক্তভূগীৰ। ইফালে মুখ্যমন্ত্ৰীৰ এই তৎপৰতাক ধন্যবাদ জনালে মৃত নৱজাতকৰ পিতৃয়ে।

এক বিশেষ খবৰ অনুসৰি শীঘ্ৰেই সলনি হ'ব অধ্যক্ষ ডাঃ অচ্যুত বৈশ্য । চৰ্চালৈ আহিছে পূৰ্বৰ GMCH ৰ অধীক্ষক ৰমেন তালুকদাৰ আৰু বাবুল বেজবৰুৱাৰ নাম । ডাঃ অচ্যুত বৈশ্যক শাস্তিমুলক বদলিৰ সম্ভাৱনা ।