বিশ্বৰ 'আটাইতকৈ বৈষম্যহীন' চতুৰ্থ দেশ ভাৰত

ডিজিটেল ডেস্কঃ ২০১১-১২ আৰু ২০২২-২৩ চনৰ ভিতৰত ভাৰতত অর্থনৈতিক বৈষম্য উল্লেখযোগ্যভাবে হ্রাস পাই ভাৰত বিশ্বৰ চতুৰ্থ বৈষম্যহীন দেশত পৰিগণিত হৈছে।

বিশ্ব বেংকৰ এখন প্রতিবেদনত এই কথা কোৱা হৈছে। যোৱা দশকটোত চৰকাৰে লোৱা বিভিন্ন পদক্ষেপ আৰু আঁচনিৰ বাবেই এই বৈষম্য হ্ৰাসৰ পাইছে বুলি চৰকাৰে কয়। বৈষম্যহীনতাৰ পৰিমাপ নিৰ্ণয় কৰা গিনি ইনডেক্স (সূচকাংক) স্ক'ৰৰ মতে বৈষম্যহীনতাৰ শীৰ্ষত আছে শ্লোভাক প্রজাতন্ত্র, শ্লোভেনিয়া আৰু বেলাৰুছ।

আনহাতে বৈষম্যহীনতাত ভাৰতৰ স্থান চীন, আমেৰিকা আৰু ব্রিটেইনতকৈ উন্নত। বিশ্ব বেংকৰ বিজ্ঞপ্তি মতে, '...ভাৰতৰ গিনি ইনডেক্স (সূচকাংক) হৈছে ২৫.৫ আৰু ভাৰত হৈছে শ্লোভাক প্রজাতন্ত্র (২৪.১), শ্লোভেনিয়া (২৪.৩) আৰু বেলাৰুছৰ (২৪.৪) পাছতে বিশ্বৰ চতুর্থ আটাইতকৈ বৈষম্যহীন দেশ।'

এখন দেশত পৰিয়াল বা ব্যক্তিসকলৰ মাজত কিদৰে সমানভাৱে আয়, সম্পত্তি আৰু উপভোগ (কনজাম্পশ্যন) বিতৰণ হয় সেই কথা জনাত গিনি সূচকাংকই সহায় কৰে। ইয়াত শূন্যৰ পৰা ১০০ লৈ থাকে। সূচকাংক শূন্য মানে নিখুঁত বৈষম্যহীনতা। আনহাতে ১০০ সূচকাংক মানে এজন লোকৰ হাতত সকলো আয়, সম্পত্তি আৰু উপভোগৰ সুবিধা আছে আৰু বাকীবোৰৰ নাই।

সেয়ে গিনি সূচকাংক বেছি মানে সেই দেশত অধিক বৈষম্য থকা। এই গিনি সূচকাংকত চীনৰ নম্বৰ হৈছে ৩৫.৭ আৰু আমেৰিকাৰ ৪১.৮। ১৬৭খন দেশৰ তথ্য প্ৰকাশ কৰা বিশ্ব বেংকৰ প্রতিবেদনৰ মতে ভাৰত 'মধ্যমীয়াভাৱে নিম্ন' (গিনি সূচকাংক ২৫-৩০) বৈষম্যৰ শ্ৰেণীত পৰিছে। বিশ্বৰ ৩০ খন দেশ 'মধ্যমীয়াভাৱে নিম্ন' বৈষম্যৰ শ্ৰেণীত পৰিছে। সেইবোৰৰ ভিতৰত আইচলেণ্ড, নৰৱে', ফিনলেণ্ড আৰু বেলজিয়াম আছে। এই শ্রেণীত উন্নয়নশীল অর্থনীতিৰ দেশ পোলেণ্ড আৰু চহকী ৰাষ্ট্ৰ সংযুক্ত আৰব আমীৰশ্বাহীও আছে। ২০১১ চনত ভাৰতৰ সূচকাংক আছিল ২৮.৮ আৰু ২০২২ চনত ই ২৫.৫ হয়।

উৎসঃ দৈনিক জনমভূমি