'প্ৰাগে দৈনিক জনমভূমিৰ দৰে ঐতিহ্যমণ্ডিত কাকতৰ দায়িত্ব লোৱাটো এক সোণসেৰীয়া অধ্যায়'

ডিজিটেল ডেস্ক : জনমভূমি পৰিয়াল প্রাগ পৰিয়ালৰ সহযোগী হোৱাৰ পাছত দেওবাৰে প্ৰথমবাৰলৈ দৈনিক জনমভূমিৰ কাৰ্যালয়লৈ আগমন ঘটে মুখ্যমন্ত্রী ড° হিমন্ত বিশ্ব শৰ্মাৰ।

'প্রাগ নিউজ'ৰ ৰূপালী জয়ন্তী বর্ষ উপলক্ষে পুনৰ নিৰ্মাণ কৰা 'প্রাগ টাৱাৰ', নৱনির্মিত অত্যাধুনিক ষ্টুডিঅ' আৰু মুখ্য দ্বাৰ মুকলিৰ পাছত 'দৈনিক জনমভূমি'ৰ কাৰ্যালয়লৈ অহা মুখ্যমন্ত্ৰীক কাকতখনৰ কাৰ্যবাহী সম্পাদক সঞ্জীৱ কুমাৰ ফুকনে এখন গামোচা আৰু ফুলৰ তোৰাৰে আদৰণি জনায়। কম সময়ৰ বাবে দৈনিক জনমভূমিৰ কাৰ্যালয়ত পদার্পণ কৰা মুখ্যমন্ত্রী ড° শৰ্মাই জনমভূমিৰ কাৰ্যালয়ৰ কৰ্মচাৰীসকলৰ সৈতে মত বিনিময় কৰে আৰু ছেলফি উঠে। যথেষ্ট বন্ধুত্বপূর্ণ মুখ্যমন্ত্ৰীৰ ব্যৱহাৰে সকলোকে উজ্জীৱিত কৰে।

মুখ্যমন্ত্ৰীক সংগ দিয়ে এ এম টেলিভিছনৰ চি এম ডি ড° সঞ্জীৱ নাৰায়ণ, প্রাগ নিউজৰ মুখ্য সম্পাদক প্রশান্ত ৰাজগুৰু, কাৰ্যবাহী সম্পাদক দেৱজিত ভূঞা আৰু দৈনিক জনমভূমিৰ কাৰ্যবাহী সম্পাদক সঞ্জীৱ কুমাৰ ফুকনে। ড° হিমন্ত বিশ্ব শর্মাই এক আছুতীয়া বার্তালাপত প্ৰাগ নিউজৰ ২৫ বছৰীয়া যাত্ৰাক উৎকৰ্ষতাৰ যাত্রা আখ্যা দি কয় যে নিউজ চেনেলৰ পৰা দৈনিক জনমভূমিৰ দৰে এখন ঐতিহ্যমণ্ডিত বাতৰি কাকতৰ পৰিচালনাৰ দায়িত্ব লোৱাটো বা অংশীদাৰ হোৱাটো এক সোণসেৰীয়া অধ্যায়। তেওঁ কয় যে যদি এই ২৫ বছৰৰ যাত্ৰাটো উভতি চোৱা যায়, তেনেহ'লে অনুভৱ হ'ব যেন এয়া এক 'স্ক্রিপটেড' যাত্রা।

উৎসঃ দৈনিক জনমভূমি