ডিজিটেল ডেস্কঃ জাপানত ২৫ হাজাৰ অসমীয়া যুৱক-যুৱতীক কৰ্ম সংস্থাপনৰ পথ মুকলি কৰাৰ গুৰুত্বপূৰ্ণ পদক্ষেপৰ কথা আজি সদৰী কৰিলে মুখ্যমন্ত্ৰী ড° হিমন্ত বিশ্ব শর্মাই।
ডিব্ৰুগড়ত অনুষ্ঠিত কেবিনেট বৈঠকত গ্ৰহণ কৰা সিদ্ধান্ত অনুসৰি জাপানত প্রতি মাহে বৃহৎ হাৰৰ দৰমহাৰ চাকৰি লাভ কৰাৰ সুযোগ সৃষ্টিৰ লক্ষ্যৰে দক্ষ কৰি তুলিবলৈ প্ৰতিগৰাকী শিক্ষার্থীৰ বাবে ৰাজ্য চৰকাৰে ডেৰ লাখ টকাৰ বৃত্তি প্রদান কৰিব। মুখ্যমন্ত্রী ড° শর্মাই কেবিনেটৰ সিদ্ধান্তৰ কথা উল্লেখ কৰি কয় যে প্রথম অৱস্থাত ৰাজ্যৰ তিনি হাজাৰ যুৱক-যুৱতীয়ে মুখ্যমন্ত্রীৰ চি এম ফ্লাইট ফ'ৰেইন লেংগুৱেজ ইনিচিয়েটিভ ফ'ৰ গ্লবেল হিউমেন টেলেন্ট (এফ এল আই ডি এইচ টি) প্রকল্পৰ অধীনত জাপানী ভাষাৰ প্রশিক্ষণ লাভ কৰিব আৰু তেওঁলোকক জাপানত চাকৰি পোৱাটোত নিশ্চয়তা দিয়া হ'ব।
গুৱাহাটীত অনুষ্ঠিত এডভান্টেজ আছাম ২.০ শীর্ষক সন্মিলনত তিনিটা জাপানী কোম্পানী ক্রমে এছিয়ান বান, জেছেক্স ভেচ লিমিটেড আৰু মেইকো কোৰিয়াৰ পাটনাৰছ লিমিটেডৰ সৈতে চুক্তি স্বাক্ষৰ কৰাৰ পাছত এই উদ্যোগ গ্রহণ কৰা হৈছে। মুখ্যমন্ত্রীয়ে কয় যে জাপানী কোম্পানীয়ে অসমলৈ আহি অসমীয়া যুৱক-যুৱতীসকলক প্রশিক্ষণ দিব। এই পাঠ্যক্ৰমৰ বাবত প্রতি গৰাকী প্রার্থীৰ খৰচ হ'ব প্রায় তিনি-চাৰি লাখ টকা।
ৰাজ্য চৰকাৰে প্ৰতিগৰাকীক ডেৰ লাখ টকাকৈ বৃত্তি প্রদান কৰিব আৰু বাকী ধন শিক্ষার্থীয়ে বহন কৰিব লাগিব। প্রশিক্ষণত সফল হোৱা প্রার্থীসকলে জাপানত প্রতি মাহে দুইৰ পৰা আঢ়ৈ লাখ টকা দৰমহা পাব। এই পাঠ্যক্রমৰ জৰিয়তে ৰাজ্যৰ ২৫ হাজাৰ অসমীয়া যুৱক-যুৱতীক জাপানে নিয়োগৰ পথ দিবলৈ আগ্রহী বুলি মুখ্যমন্ত্রীয়ে কয়।
অসমৰ সামাজিক-অর্থনৈতিক পৰিৱেশ পৰিৱর্তনৰ লক্ষ্যৰে কেবিনেটে গ্রহণ কৰা আন কেইবাটাও সিদ্ধান্তৰ কথা সংবাদমেলত ড° শর্মাই উল্লেখ কৰে। তেওঁ কয় যে এই সিদ্ধান্তসমূহে শিক্ষা সংস্কাৰ, বিশ্বব্যাপী নিয়োগৰ সুযোগ, ষ্টার্ট-আপ সহায়তা, বিকেন্দ্রীকৃত শাসন আৰু নাগৰিক আন্তঃগাঁথনি উন্নয়নক সামৰি লৈছে। অসমৰ উদ্যোক্তা পৰিৱেশ শক্তিশালী কৰিবলৈ কেবিনেটে উদ্ভাৱন, ইনকিউবেশ্যন আৰু ষ্টার্ট-আপ বিভাগৰ (DIIS) অধীনত 'অসম ইনোভেশ্যন এণ্ড ষ্টার্ট-আপ ফাউণ্ডেশ্যন' নামৰ এটা ধাৰা ৮ কোম্পানী গঠনৰ অনুমোদন দিয়ে। এই ফাউণ্ডেশ্যনে ৰাজ্যৰ ষ্টার্ট-আপসমূহৰ বাবে উদ্ভাৱন, ইনকিউবেশ্যন, পুঁজিৰ সুবিধা আৰু পথপ্রদর্শনক প্ৰসাৰিত কৰিবলৈ এক নির্দিষ্ট মঞ্চ হিচাপে কাম কৰিব। 'এই ফাউণ্ডেশ্যনে নৱোদ্যমী উদ্যোক্তাসকলৰ বাবে এক-স্থান মঞ্চ হিচাপে কাম কৰিব, যিয়ে উদ্ভাৱনীমূলক ধাৰণাসমূহক সফল ব্যৱসায়লৈ ৰূপান্তৰিত কৰিবলৈ পথপ্রদর্শন, পুঁজি আৰু নীতিগত সহায়তা প্রদান কৰিব,' মুখ্যমন্ত্রী শর্মাই কয়।
শিক্ষাৰ ক্ষেত্রত এক প্রধান পদক্ষেপত কেবিনেটে বিশ্ব বেংকৰ পৰা ২,৭৫০ কোটি টকাৰ ঋণৰ অনুমোদন দিয়ে, য'ত ৯০% কেন্দ্রীয় চৰকাৰে বহন কৰিব আৰু বাকী ১০% (২৭৫ কোটি টকা) ৰাজ্য চৰকাৰে বহন কৰিব। এই পুঁজি গণিত আৰু বিজ্ঞানত শিক্ষক প্রশিক্ষণ, প্রধান শিক্ষক আৰু অধ্যক্ষসকলৰ বাবে নেতৃত্ব কার্যসূচী, বিদ্যালয়সমূহত বিজ্ঞান আৰু প্রযুক্তি প্ৰসাৰ আৰু ঝৰা পৰাৰ হাৰ হ্ৰাসৰ বাবে ব্যৱহাৰ কৰা হ'ব। তদুপৰি, ৪০০ খন চৰকাৰী বিদ্যালয়ে আন্তঃগাঁথনি উন্নয়নৰ বাবে প্রতিখনে ৩-৫ কোটি টকা লাভ কৰিব, আনহাতে ১,৭৩৩টা অংগনৱাড়ী কেন্দ্রই উন্নয়নৰ বাবে প্রতিটোৱে ২৫ লাখ টকা পাব।
এক যুগান্তকাৰী সিদ্ধান্তত ১০ টা নৱসৃষ্ট সম-জিলা আগষ্ট ১২ তাৰিখৰ ভিতৰত সম্পূর্ণৰূপে কার্যক্ষম হ'ব, প্রত্যেকৰে নিজস্ব প্রশাসনিক সদৰ দপ্তৰ থাকিব। সম-জিলাসমূহ হ'ল বকো ছয়গাঁও, পলাশবাৰী, বৰচলা, ৰঙাপাৰা, মাকুম, ডিগবৈ, টীয়ক, মৰিয়নী, ধলাই আৰু দুধনৈ। কেবিনেটে মসৃণ প্রশাসনিক কাৰ্যকলাপৰ বাবে ১০ টা নতুন সহ-জিলা আৰক্ষী অধীক্ষক (CDSP) পদৰো অনুমোদন দিয়ে। কেবিনেটে বিধায়ক স্থানীয় অঞ্চল উন্নয়ন আঁচনি (MLALADS) আৰু একত্রিত পুঁজিৰ দ্বাৰা পুঁজি যোগানেৰে এপার্টমেন্ট ভৱনসমূহত সামূহিক নাগৰিক আন্তঃগাঁথনি উন্নত কৰাৰ নতুন আঁচনিৰো অনুমোদন দিয়ে। কেবিনেটে আৰক্ষী থানা আধুনিকীকৰণৰ লক্ষ্যৰে মিছন অব্ অ'ভাৰঅল ইমপ্রুভমেন্ট অব থানা ফৰ ৰেস্পন্সিভ ইমেজ (MOITRI) আঁচনিৰ বাবে ১৫০ কোটি টকা আবন্টন কৰে।
এইটো অসমত আৰক্ষী আন্তঃগাঁথনি আধুনিকীকৰণৰ এক নিৰন্তৰ প্ৰচেষ্টা। প্রথম পর্যায়ত ৭৩টা আৰক্ষী থানা ইতিমধ্যে সম্পূর্ণ হৈছে। দ্বিতীয় পর্যায়ত ৪৬টা আৰক্ষী থানা হাতত লোৱা হৈছিল, যাৰ ভিতৰত ৩১টা আৰু এটা চাইবাৰ আৰক্ষী থানা সম্পূর্ণ হৈছে। বাকী কামবোৰ চলি আছে। মুখ্যমন্ত্রীয়ে উল্লেখ কৰে যে ১,৫০০ কোটি টকাৰ অসম আৰক্ষীৰ আন্তঃগাঁথনি উন্নত কৰা হৈছে, যিটো ৰাজ্যৰ ইতিহাসত এক অভূতপূর্ব পৰিমাণ। মিছন বসুন্ধৰা ৩.০ৰ অধীনত প্রায় ৫০০টা প্রতিষ্ঠান, য'ত নামঘৰ, মন্দিৰ আৰু বিদ্যালয় আদি অন্তর্ভুক্ত, সমাজ উন্নয়নৰ বাবে ভূমি আবণ্টন লাভ কৰিব।
উৎসঃ দৈনিক জনমভূমি
Continue Reading
