কাৰাগাৰত মৌলবাদৰ প্ৰসাৰক লৈ উদ্বিগ্ন কেন্দ্ৰ ; নিয়ন্ত্ৰণৰ বাবে ৰাজ্যসমূহলৈ পত্ৰ

ডিজিটেল ডেস্কঃ দেশৰ কাৰাগাৰসমূহত মৌলবাদৰ উত্থানক লৈ গভীৰভাৱে চিন্তিত হৈ পৰিছে কেন্দ্ৰীয় চৰকাৰ। কেন্দ্রীয় গৃহ ম্যালয়ে কাৰাগাৰত মৌলবাদৰ প্ৰসাৰ ৰোধ কৰাত গুৰুত্ব আৰোপ কৰিছে।

গৃহ ম্যালয়ে কয় যে ৰাজহুৱা ব্যৱস্থা বাহাল ৰখা আৰু অভ্যন্তৰীণ সুৰক্ষা সু-নিশ্চিত কৰিবৰ কাৰণে এই প্ৰৱণতা নিয়ন্ত্ৰণ কৰিবলৈ তৎক্ষণাৎ ব্যৱস্থা গ্ৰহণৰ প্রয়োজন।

কাৰাগাৰসমূহত মৌলবাদৰ প্ৰসাৰ প্ৰতিৰোধ কৰিবৰ কাৰণে কেন্দ্ৰীয় গৃহ মন্ত্ৰ্যালয়ে সকলো ৰাজ্য তথা কেন্দ্রীয় শাসিত অঞ্চললৈ পত্ৰ প্ৰেৰণ কৰিছে। পত্ৰখনত কাৰাগাৰসমূহত থকা কয়দীৰ সম্পৰ্কত অনুসন্ধান কৰা, কয়দীৰ পৰা সৃষ্টি হ'ব পৰা ভাবুকিৰ বিষয়ে সময়ে সময়ে পর্যালোচনা কৰা সন্দেহ জনক কয়দীৰ প্ৰতি সতর্ক দৃষ্টি ৰখাৰ লগতে সুকীয়াকৈ ৰখাৰ ব্যৱস্থা কৰাকে ধৰি মৌলবাদৰ প্ৰসাৰ প্ৰতিৰোধ কৰিবলৈ গ্রহণ কৰিবলগীয়া পদক্ষেপসমূহৰ তালিকাও পত্ৰখনৰ লগতে প্ৰেৰণ কৰা হৈছে।

আনহাতে, মৌলবাদৰ সৈতে জড়িত কয়দীক ইয়াৰ পৰা মুক্ত কৰাৰ বাবে ব্যৱস্থা কৰাতো গৃহ মন্ত্র্যালয়ে গুৰুত্ব আৰোপ কৰে। পত্ৰখনত উল্লেখ কৰা হৈছে যে কাৰাগাৰত মৌলবাদৰ উত্থানে বিপজ্জনক ৰূপ ল'ব পাৰে, কিয়নো কাৰাগাৰ বন্ধ স্থান আৰু ই সামাজিকভাবে একাষৰীয়া। গৃহ মন্ত্ৰ্যালয়ৰ মতে, বিভিন্ন গোটৰ প্ৰভাৱ আৰু নিৰীক্ষণৰ অভাৱৰ ফলত চৰমপন্থী বিচাৰধাৰাই প্ৰসাৰ লাভ কৰিব পাৰে।

উৎসঃ দৈনিক জনমভূমি